राष्ट्रवादी शरदचंद्र पवार पक्षाला मोठा दिलासा मिळाला आहे. काही दिवसांपूर्वी ईश्वरपूरच्या नगराध्यक्ष पद रद्द करण्यात आले होते. मात्र आता या आदेशाला स्थगिती देण्यात आली आहे. जयंत पाटील यांचे निकटवर्तीय असणारे ईश्वरपूरचे नगराध्यक्ष आनंदराव मलगुंडे यांचे नगराध्यक्ष पद रद्द करण्यात आले होते, मात्र आता या पदाला स्थिगिती देण्यात आली आहे. याबाबत सविस्तर माहिती जाणून घेऊयात.
आनंदराव मलगुंडे यांचे नगराध्यक्ष पद रद्द करण्याच्या आदेशाला स्थगिती
ईश्वरपूरचे राष्ट्रवादी शरद पवार पक्षाचे नगराध्यक्ष आनंदराव मलगुंडे यांचे नगराध्यक्ष पद रद्द करण्यात आले होते. सांगलीचे जिल्हाधिकारी मैनाक घोष यांनी बांधकाम अनियमित प्रकरणी आनंदराव मलगुंडे यांच्यावर अपात्रतेची कारवाई केली होती. नगराध्यक्ष पदाबरोबर मलगुंडे यांचे बंधू सुनील मलगुंडे यांचे नगरसेवक पद देखील अपात्र ठरवण्यात आले होते. मात्र आता नगर विकास विभागाकडून नगराध्यक्ष व नगरसेवक पद अपात्रतेच्या कारवाईला स्थगिती देण्यात आली आहे. आता पुढील सुनावणी होईपर्यंत आनंदराव मलगुंडे यांचे नगराध्यक्ष पद कायम राहणार आहे. या प्रकरणी शरद पवार यांच्या पक्षाचे ज्येष्ठ नेते जयंत पाटील यांनी मुख्यमंत्री देवेंद्र फडणवीस यांची भेट घेतली असल्याचीही माहिती समोर आली आहे.
नगराध्यक्षपद रद्द का झाले होते?
आनंदराव मलगुंडे व त्यांचे बंधू सुनील मलगुंडे यांची एकत्रित मालकीची पेठ सांगली रोडला बसस्थानकाजवळ लॉजिंग व शॉपिंग सेंटर इमारत आहे. ही इमारत ही पेठ सांगली राज्यमार्गाला अगदी खेटून उभी आहे. या इमारतीच्या बांधकाम परवानगी व नियमितीकरणाबाबतची माहिती व बांधकाम नियमितीकरणाबाबतची सर्व माहिती जाधव यांनी माहिती अधिकारात मागवली होती. नंतर ही माहिती जिल्हाधिकाऱ्यांना देत आनंदराव मलगुंडे यांचे नगराध्यक्षपद रद्द करावे, यासाठी अर्ज देण्यात आला होता. आनंदराव मलगुंडे हे गेली कित्येक वर्षे नगरपालिकेत नगरसेवक, नगराध्यक्ष व सध्याही नगराध्यक्ष आहेत. त्यांनी आपल्या पदाचा दुरुपयोग करून ही इमारत बांधली आहे असा आरोप जाधव यांनी केला होता. सुनावणीनंतर जिल्हाधिकाऱ्यांनी आनंदराव मलगुंडे यांचे पद रद्द करण्याचा निर्णय घेतला होता, मात्र आता या आदेशाला स्थगिती देण्यात आली आहे.
Leave a Reply