बॉलिवूडमध्ये प्रत्येक कलाकाराची एन्ट्री मोठ्या आणि पूर्ण प्लानिंगने होते. पण अभिनेत्री प्रिती झंगियानी हिची बॉलिवूडमधील एन्ट्री फार वेगळी आहे. प्रितीने कधीच अभिनेत्री होण्याचं स्वप्न पाहिलं नव्हतं आणि ‘मोहब्बतें’ सिनेमात काम करण्याची संधी मिळेल, अशी कल्पना देखील केली नव्हती. पण मॉडेलिंगने करियरची सुरुवात करणाऱ्या प्रितीला अचानक यश राज फिल्म्समधून एक फोन आला आणि प्रिती हिला महानायक अमिताभ बच्चन, शाहरुख खान, ऐश्वर्या राय फेम ‘मोहब्बतें’ यांच्या सिनेमात काम करण्याची संधी मिळाली. 2000 मध्ये प्रदर्शित झालेल्या सिनेमातून प्रिती एका रात्रीत लोकप्रिय झाली.
अभिनेत्री प्रिती झंगियानी हिचा जन्म 18 ऑगस्ट 1980 मध्ये एका सिंधी कुटुंबात झाला. सिनेमात येण्यापूर्वी ती मॉडलिंग करायची. 1997 मध्ये तिला राजश्री प्रॉडक्शनच्या ‘ये है प्रेम’ या म्युझिक अल्बममध्ये काम करण्याची संधी मिळाली. या म्युझिक व्हिडिओमुळे तिला ओळख मिळाली आणि त्यानंतर ती अनेक जाहिरातींमध्ये झळकली.
प्रीतीने फिल्मी करियरची सुरुवात बॉलीवूडमधून नाही, तर दाक्षिणात्य चित्रपटसृष्टीतून केली; 1999 मध्ये प्रदर्शित झालेल्या ‘मझाविल्लू’ या मल्याळम सिनेमात दिसली. त्यानंतर तिने ‘थम्मूडू’ या तेलगू सिनेमात काम केलं. अशात हिंदी चित्रपटसृष्टीत प्रवेश करण्याचा तिचा मार्ग मोकळा झाला. ‘मोहब्बतें’ सिनेमा आणि सिनेमातील प्रितीचा किस्सा फार वेगळा आहे.
Preeti Jhangiani
प्रितीने एका मुलाखतीत सांगितलं, तिला अचानक यश राज फिल्म्सच्या ऑफिसमधून फोन आला. तिला निर्माते आदित्य चोप्रा यांनी बोलावलं होतं. सर्वात खास गोष्ट म्हणजे, प्रिती हिला सिनेमासाठी कोणतं ऑडिशन देखील द्यावं लागलं नाही. एका भेटीनंतर प्रिती हिला ‘मोहब्बतें’ सिनेमात काम करण्याची संधी मिळाली. त्यानंतर अनेक सिनेमात प्रितीने काम केलं. पण तिला हवी तशी लोकप्रियता मिळाली नाही.
बॉलिवूडमध्ये ओळख निर्माण करण्याचा प्रयत्न केल्यानंतर प्रिती हिने लग्न केलं. अभिनेत्रीने परवीन डबास (Parvin Dabas) याच्यासोबत 2008 मध्ये लग्न केलं. त्यानंतर प्रिती हिने अभिनयाला निरोप दिला आणि संपूर्ण वेळ कुटुंबाला दिला. त्यानंतर 2017 मध्ये प्रिती राजस्थानी ‘तावड़ो: द सनलाइट’ सिनेमात दिसली. सिनेमात तिने साकारलेल्या भूमिकेला चाहत्यांनी डोक्यावर देखील घेतलं. त्यानंतर तिने ओटीटी प्लॅटफॉर्म देखील पदार्पण केलं.
Leave a Reply