अमेरिका आणि इराणमध्ये युद्धविराम झाला आहे. मात्र युद्धविरामानंतर देखील अजूनही स्ट्रीट ऑफ होर्मूजवर तणाव कायम आहे. स्ट्रीट ऑफ होर्मूजवर अद्याप कोणताही तोडगा निघू शकलेला नाहीये. युद्धविराम झाल्यानंतर देखील इराणने स्ट्रीट ऑफ होर्मूज पूर्णपणे आपल्या नियंत्रणात ठेवलं आहे, तर दुसरीकडे अमेरिकेने देखील या भागात आपल्या युद्धनौका तैनात केल्या असून, रस्ता ब्लॉक केला आहे. आम्ही या मार्गाने एकही जहाज जाऊ देणार नाही असं अमेरिकेचे राष्ट्राध्यक्ष डोनाल्ड ट्रम्प यांनी म्हटलं आहे. स्ट्रीट ऑफ होर्मूज डबल ब्लॉक झाल्यामुळे आता जगासमोर मोठं ऊर्जा संकट निर्माण झालं आहे, त्याचा मोठा फटका हा भारताला देखील बसताना दिसून येत आहे. दरम्यान भारतासाठी आता एक आनंदाची बातमी आहे. रशिया पुन्हा एकदा भारताच्या मदतीला धावून आला आहे.
स्ट्रीट ऑफ होर्मूज बंद असल्यामुळे भारतामध्ये सध्या एलपीजी सिलिंडरचा तुटवडा जाणवत आहे. अशा स्थितीमध्ये भारतासाठी एक दिलासादायक बातमी समोर आली आहे, ती म्हणजे रशियाचं एक विशाल जहाज Kunpeng, एलएनजी (LNG) ची खेप घेऊन भारताच्या दिशेनं येत आहे. या जहाजाच्या प्रवासाकडे आणि त्यामध्ये असलेल्या एलनजीकडे संपूर्ण जगाचं लक्ष लागलं आहे. कारण अमेरिकेनं पुन्हा एकदा रशियावर प्रतिबंध घातले आहेत, युद्धकाळात हे प्रतिबंध शिथिल करण्यात आले होते, मात्र पुन्हा एकदा प्रतिबंध लादण्यात आले आहेत, अशा स्थितीमध्ये रशियातून एलएनजीची मोठी खेप भारतात येत आहे. त्यामुळे पुन्हा एकदा भारत आणि अमेरिकेमध्ये काहीसा तणाव पहायला मिळू शकतो.
मात्र भारतानं यापूर्वी देखील आपलं ऊर्जा धोरण स्पष्ट करताना अमेरिकेला स्पष्ट शब्दात सुनावलं होतं की, आम्हाला ज्या देशाकडून अधिक स्वस्त आणि पुरेशा प्रमाणात कच्च तेल तसेच इतर इंधन मिळेल तिथून ते आम्ही खरेदी करू. दरम्यान अमेरिका आणि इराणमध्ये युद्ध सुरू झाल्यानंतर पुन्हा एकदा भारतानं रशियाकडून कच्च्या तेलाची आयात मोठ्या प्रमाणात वाढवली आहे.
Leave a Reply