इराण आणि अमेरिका यांच्यातील शांतता कराराबाबत पाकिस्तानमध्ये चर्चा सुरू आहे. मात्र ही चर्चा अपयशी ठरली आहे. त्यामुळे आता दोन्ही देशांमधील संघर्ष पुन्हा सुरू होणार का? याकडे संपूर्ण जगाचे लक्ष लागले आहे. कारण दोन्ही देशांनी आपण युद्धासाठी तयार असल्याची माहिती दिली आहे. ही चर्चा फिस्कटल्यानंतर आता अमेरिकेचे राष्ट्राध्यक्ष डोनाल्ड ट्रम्प यांनी केलेल्या एका विधानामुळे युद्धाच्या शक्यतेची चर्चा पुन्हा वाढली आहे. डोनाल्ड ट्रम्प यांनी संतप्त होत नेमकं काय म्हटलं याबाबत सविस्तर माहिती जाणून घेऊयात.
पाकिस्तानमध्ये अमेरिका आणि इराण यांच्यात चर्चा पार पडली, मात्र यात तोडगा निघालेला नाही, त्यामुळे डोनाल्ड ट्रम्प संतप्त झाले आहेत. त्यांनी इराणला पुन्हा पाषाण युगात पाठवण्याची धमकी दिली आहे. ट्रम्प यांनी आपल्या सोशल मीडिया प्लॅटफॉर्म ट्रुथ सोशलवर एक पोस्ट शेअर केली आहे, ज्यामुळे इराणचे वाईट दिवस पुन्हा सुरू होण्याची शक्यता वर्तवली जात आहे. त्यांनी आधीच म्हटले आहे की, करार झाला किंवा नाही, याने आम्हाला काही फरक पडत नाही. आम्ही आधीच जिंकलो आहोत.
अमेरिका इराणला कसं घेरणार?
ट्रम्प यांनी ट्रुथ सोशलवर एक बातमीचा लेख शेअर केला आहे, ज्यामध्ये असा उल्लेख आहे की, चर्चा अपयशी झाल्यानंतर आता ट्रम्प यांच्याकडे इराणची नौदल नाकेबंदी करण्याचा पर्याय उपलब्ध आहे. हा लेख चर्चा सुरु असतानाचा असला तरी त्यात असे लिहिलेले आहे की, जर इराणने अंतिम प्रस्ताव नाकारला, तर ट्रम्प यांच्याकडे अनेक पर्याय तयार आहेत. यात इराणला पाषाण युगात पाठवण्याची धमकीही दिली आहे. तसेच अमेरिका आता व्हेनेझुएलासारखीच इराणची आर्थिक नाकेबंदी करू शकते.
हॉर्मुज सामुद्रधुनीवर नियंत्रण ठेवणे सोपे
लेक्सिंग्टन इन्स्टिट्यूटच्या सुरक्षा तज्ज्ञ रेबेका ग्रँट यांनी म्हटले की, अमेरिकन नौदलासाठी आता हॉर्मुज सामुद्रधुनीवर नियंत्रण ठेवणे अधिक सोपे होईल. मागील 24 तासांत सुमारे 10 जहाजांनी प्रवास केला, यात एका रशियन टँकरचीही समावेश होता. त्यांनी पुढे म्हटले की, जर इराणने आक्रमक भूमिका घेतली, तर अमेरिकन नौदल आपली देखरेख वाढवेल. असं झाल्यास खार्ग बेट किंवा ओमानजवळील अरुंद मार्गातून जाण्यासाठी अमेरिकन नौदलाची परवानगी घेणे गरजेचे असून शकते. त्यामुळे अमेरिका या मार्गावर नियंत्रण मिळवू शकते.
Leave a Reply