युक्रेनकडून दोन दिवसांपूर्वी रशियाच्या एका शहरामध्ये असलेल्या विद्यार्थ्यांच्या वस्तीगृहावर ड्रोन हल्ला करण्यात आला होता. या हल्ल्यामध्ये दहा विद्यार्थ्यांचा मृत्यू झाला होता, तसेच त्या परिसरात रात्रभर हल्ले सुरूच होते. युक्रेनकडून करण्यात आलेल्या या हल्ल्यांमध्ये रशियाचे 38 नागरिक देखील जखमी झाले होते. त्यानंतर रशियाचे राष्ट्रपती व्लादीमीर पुतिन हे अधिक आक्रमक झाले होते. नागरी वस्तींवर आणि विद्यार्थ्यांच्या होस्टेलवर जाणीवपूर्वक केलेले हल्ले आम्ही सहन करणार नाहीत, याचा बदला घेऊ असा इशारा त्यांनी युक्रेनला दिला होता, सैन्याला हल्ल्यासाठी तयार राहण्याचे आदेश देखील दिले होते. रशिया युक्रेनवर मोठा हल्ला करणार अशी भीती व्यक्त करण्यात येत होती. शेवटी ही भीती खरी ठरली आहे. मोठी बातमी समोर येत आहे, ती म्हणजे रशियाकडून युक्रेनची राजधानी असलेल्या कीववर भीषण हल्ला करण्यात आला आहे. तब्बल 600 ड्रोन आणि 90 मिसाईलने रशियाने युक्रेनची राजधानी असलेल्या कीववर हल्ला केला आहे.
गेल्या काही आठवड्यांमध्ये रशियानं युक्रेनवर केलेल्या हल्ल्यांमध्ये हा सर्वात मोठा आणि भीषण हल्ला मानला जात आहे. रशियानं केलेल्या या हल्ल्यानंतर कीवच्या अनेक भागांमध्ये भीषण आग लागल्याचं आणी धुरांचे लोट उठल्याचं चित्र पहायला मिळालं. या हल्ल्यामध्ये युक्रेनचं प्रचंड नुकसान झालं आहे. युक्रेनच्या अधिकाऱ्याने दिलेल्या माहितीनुसार रशियाने 600 ड्रोन आणि 90 मिसाईलचा या हल्ल्यामध्ये वापर केला आहे. हल्ला झाल्याचे कळताच युक्रेनच्या एअर डिफेंस प्रणालीने अनेक ड्रोन आणि मिसाईल निष्क्रिय केले, मात्र ड्रोन आणि मिसाईलची संख्याचं एवढी प्रचंड होती की, त्यातील अनेक मिसाईल आपल्या लक्ष्यापर्यंत पोहोचल्या आहेत.
वृत्तसंस्था एएफपीच्या एका रिपोर्टनुसार रशियाकडून करण्यात आलेल्या या हल्ल्यामध्ये युक्रेनचं पु्न्हा एकदा प्रचंड नुकसान झालं आहे. रशियानं युक्रेनच्या लुकियानिव्स्का मेट्रो स्टेशन जवळ असलेलं मोठं बिझनेस सेंटर देखील जमिदोस्त केलं आहे. रशियाकडून करण्यात आलेल्या या हल्ल्यामध्ये युक्रेनमधील चार नागरिकांचा मृत्यू झाला आहे, तर अनेकजण जखमी झाले आहेत. दरम्यान रशियाच्या हल्ल्यामुळे आता हे युद्ध आणखी पेटण्याची शक्यता आहे.
Leave a Reply