घाटकोपरच्या नित्यानंद नगर येथे एका नराधमाने दोन चिमुकल्या मुलींना घरात बोलावून त्यांच्याशी अश्लील वर्त करत अतिप्रसंग करण्याचा प्रयत्न केल्याचा धक्कादायाक प्रकार उघडकीस आला आणि संपूर्ण शहर हादरलं. या घटनेमुळे प्रचंड संतापाचं वातावरण असून ही घटना चांगलीच चर्चेत आली आहे. मात्र लहान मुलींवरील अत्याचार प्रकरणात आता क्राईम ब्रांच तपास करणार आहे. पोलिसांची विशेष टीम या प्रकरणाचा संपूर्ण तपास करणार आहे. भाजप नेते किरीट सोमय्या यांचं फोनवरून जॉईंट पोलीस कमिशनर लखमी गौतम यांच्याशी बोलणं झालं आहे. घाटकोपर येथील पीडित कुटुंबियांना न्याय मिळवून देण्यासाठी किरीट सोमय्या यांनी तब्बल 14 तासं आंदोलन केलं. त्यानंतर आता प्रकरणाचा तपास क्राईम ब्रांच कडून करण्यात येणार आहे, तसेच पीडित कुटुंबियांच्या घरच्यांना अटक केलेली होती, त्याचादेखील तपास होणार आहे. याच प्रकरणात जर कोणी दोषी आढळून आल्यास संबंधित पोलिस अधिकारी यांच्यावर देखील कारवाई होईल.
पीडित कुटुंबियांना न्याय मिळवून देण्यासाठी किरीट सोमय्या आक्रमक, 14 तास आंदोलन
घाटकोपर नित्यानंद नगर येथे दोन लहान मुलीवर झालेल्या अत्याचाराच्या प्रकरणात पीडित कुटुंबीयांना न्याय मिळवून देण्यासाठी किरीट सोमय्या आक्रमक झाले. सोमय्या यांनी काल घाटकोपर चिराग नगर पोलीस स्थानकाच्या बाहेर आंदोलनाची भूमिका स्वीकारली. घाटकोपर चिराग नगर पोलीस स्थानकाच्या बाहेर त्यांनी तब्बल चौदा तास आंदोलन केलं, दुपारी 2 वाजल्यापासून पहाटेच्या 4 वाजेपर्यंत हे आंदोलन चालले . पोलिसांनी ज्या प्रकारे पीडित कुटुंबीयांच्या घरातील व्यक्तींवर गुन्हा दाखल करून कारवाई केली आहे ती कारवाई चुकीची आहे, असा दावा किरीट सोमय्या यांनी केला. याच आंदोलनामध्ये काल आमदार पराग शहा स्वतः किरीट सोमय्या महापौर रितू तावडे स्थानिक भाजपचे नगरसेवक उपस्थित होते तसेच हिंदू संघटना देखील उपस्थित होत्या. जोपर्यंत न्याय मिळत नाही तोपर्यंत पोलीस ठाण्यात थांबण्याची भूमिका किरीट सोमय्या यांनी घेतली होती. मध्यरात्रीमध्ये किरीट सोमय्या हे पोलिस स्थानकातचं झोपले होते.
अखेर मध्यरात्री किरीट सोमय्या यांचे पोलीस कमिशनर व जॉइंट पोलीस कमिशनर लखमी गौतम यांच्याशी बोलणं झाले. या प्रकरणाची चौकशी सहआयुक्त लखमी गौतम करणार असून यात दोषी आढळल्यास संबंधित अधिकाऱ्यांवर कारवाईचे करण्याचे आदेश पोलीस आयुक्तांनी दिल्याने किरीट सोमय्या यांनी हे आंदोलन मागे घेतले. या दरम्यान मुंबई च्या महापौर रितू तावडे, आमदार पराग शहा आणि भाजपचे अनेक नगर सेवक आणि पदाधिकारी या आंदोलनात सहभागी झाले होते. किरीट सोमय्या हे पोलीस ठाण्यातच जेवण करून, झोपले होते. मात्र पोलिसानी रात्री त्यांना हे आश्वासन दिल्यावर अखेर आंदोलन मागे घेण्यात आले.
Leave a Reply