वूमन्स प्रीमियर लीग स्पर्धेतील चौथ्या मोसमात (WPL 2026) साखळी फेरीतील 20 व्या आणि शेवटच्या सामन्यात दिल्ली कॅपिट्ल्स विरुद्ध यूपी वॉरियर्स आमनेसामने आहेत. हा सामना बडोद्यातील कोतांबीमधील बीसीए स्टेडियममध्ये आयोजित करण्यात आला आहे. सामन्याला संध्याकाळी 7 वाजून 30 मिनिटांनी सुरुवात होणार आहे. त्याआधी 7 वाजता टॉस झाला. दिल्लीच्या बाजूने नाणेफेकीचा कौल लागला आहे. कॅप्टन जेमिमाह रॉड्रिग्स हीने बॉलिंगचा निर्णय घेत यूपीला बॅटिंगसाठी भाग पाडला आहे. या सामन्याच्या निकालावर 2 संघांचं भवितव्य अवलंबून आहे. त्यामुळे हा सामना कोण जिंकणार? याकडे क्रिकेट चाहत्यांचं लक्ष असणार आहे.
डब्ल्यूपीएल स्पर्धेत 5 पैकी 3 संघ क्वालिफायरसाठी पात्र ठरतात. यंदा आरसीबीने स्मृती मंधाना हीच्या नेतृत्वात थेट अंतिम फेरीत धडक दिलीय. तर गुजरात जायंट्सने टीमनेही क्वालिफायरमध्ये प्रवेश केला आहे. आता तिसऱ्या आणि अंतिम जागेसाठी दिल्ली आणि मुंबई यांच्यात थेट लढत आहे. दिल्लीने हा सामना जिंकल्यास ते थेट प्लेऑफसाठी पात्र ठरतील. मात्र युपीने विजय मिळवल्यास मुंबईचा फायदा होईल. युपीच्या विजयामुळे मुंबईला प्लेऑफचं तिकीट मिळेल. त्यामुळे युपीने जिंकावं, अशीच प्रार्थना मुंबईची असणार आहे.
युपीसाठी दिल्ली विरुद्धचा सामना औपचारिकता
युपीचं या मोसमातून आव्हान संपुष्टात आलं आहे. त्यामुळे युपीसाठी हा सामना केवळ औपचारिकता आहे. मात्र युपीकडे हा सामना जिंकून मुंबईला मदत करण्यासह दिल्लीचा गेम करण्याची दुहेरी संधी आहे.
नेट रनरेट ठरणार गेम चेंजर!
मुंबईने या मोसमात एकूण 8 तर दिल्लीने 7 सामने खेळले आहेत. दोन्ही संघांनी प्रत्येकी 3-3 सामने जिंकले आहेत. मात्र मुंबईचा दिल्लीच्या तुलनेत नेट रनरेट चांगला आहे. मुंबईचा नेट रनरेट हा +0.059 इतका आहे. तर दिल्लीचा नेट रनरेट हा -0.164 असा आहे. त्यामुळे जर युपीने दिल्लीला पराभूत केलं तर मुंबई 6 गुणांसह नेट रनरेटच्या जोरावर प्लेऑफमध्ये पोहचेल. त्यामुळे या सामन्यातील प्रत्येक अपडेटकडे मुंबईकह चाहत्यांचं बारीक लक्ष असणार आहे.
यूपी वॉरियर्स प्लेइंग ईलेव्हन : मेग लॅनिंग (कॅप्टन), सिमरन शेख, हर्लीन देओल, दीप्ती शर्मा, शिप्रा गिरी (विकेटकीपर), डिआंड्रा डॉटिन, चार्ली नॉट, सोफी एक्लेस्टोन, आशा शोभना जॉय, शिखा पांडे आणि क्रांती गौड.
दिल्ली कॅपिटल्स प्लेइंग ईलेव्हन: शफाली वर्मा, लिझेल ली (विकेटकीपर), लॉरा वोल्वार्ड, जेमिमाह रॉड्रिग्स (कर्णधार), मारिझान कॅप, चिनेल हेन्री, निकी प्रसाद, स्नेह राणा, मिन्नू मणी, श्री चरणी आणि नंदनी शर्मा
Leave a Reply