Vaibhav Suryavanshi on Jasprit Bumrah: भारतीय गोलंदाज जसप्रीत बुमराह याची गोलंदाजी अनेक दिग्गज खेळाडू अत्यंत सावधगिरीने खेळतात. त्याचा चेंडू कधी चकवा देऊन त्रिफळा उडवेल याचा काही नेम नसतो. तर अनेक खेळाडू त्याच्या चेंडूवर करायला नको ती चूक हमखास करतात. पण 15 वर्षांच्या वैभव सूर्यवंशीने या दिग्गज फलंदाजाच्या पहिल्याच चेंडूवर सणसणीत षटकार लगावला आणि सर्वांनाच आश्चर्याचा धक्का बसला. दस्तूरखुद्द बुमराहला सुद्धा त्याने अचंबित केले. ज्या बुमराह पुढे जगातील फलंदाज चळचळ कापतात, त्याच्या पहिल्याच चेंडूवर षटकार ठोकल्याची एकच चर्चा सुरू आहे. आयपीएलच्या (IPL 2026) हंगामात राजस्थान रॉयल्सने मुंबई इंडियन्सविरोधातील तिसरा सामना आरामात खिशात घातला. त्यावेळी वैभवच्या फलंदाजीने अनेकांचे लक्ष वेधले.
वैभवच्या डोक्यात होते काय?
वैभवने या सामन्यात बुमराह याच्या चेंडूवर दोन षटकार ठोकले. त्याचा हा फटका पाहिल्यावर बुमराह सुद्धा आश्चर्यचकीत झाला. त्याला या नुकतंच मिसुरडं फुटलेल्या पोराचं कोण कौतुक वाटलं. बुमराहच्या गोलंदाजाची त्याच्यावर कोणताच परिणाम झालेला दिसला नाही. बुमराह याला जेव्हा षटकार हाणला, त्यावेळी वैभवच्या डोक्यात कोणता विचार होता. त्याला काय वाटते होते. याचे उत्तर त्यानेच दिले आहे.
“मी त्यावेळी इतकाच विचार करत होतो की मी गोलंदाज कोण आहे हे नाही पाहणार. केवळ त्याच्या चेंडूवर माझे लक्ष्य होते. मी थोडा निराश होतो की इतका तगडा गोलंदाज आपल्यासमोर आहे. पण मी माझी नैसर्गिक लय बिघडू दिली नाही. मी माझ्या लयीने खेळलो” अशी प्रतिक्रिया वैभव सूर्यवंशीने दिली आहे.
39 धावा कुटल्या
मुंबई इंडियन्सविरोधातील सामना हा पावसाने बाधित झाला. त्यानंतर वैभव सूर्यवंशीने 14 चेंडूत 39 धावांची तुफानी खेळी खेळली. हा सामना 11-11 षटकारांचा खेळण्यात आला. राजस्थानसाठी वैभव सूर्यवंशी आणि यशस्वी जायसवाल हे सलामीला उतरले. या दोघांनी मिळून 30 चेंडूत 80 धावा कुटल्या. राजस्थान रॉयल्ससाठी वैभवने जोरदार खेळी खेळली. त्याने बुमराह याला दोन षटकार ठोकले. तर यशस्वीने 32 चेंडूत 77 धावा काढल्या. या दोघांच्या दमदार खेळीमुळे राजस्थान रॉयल्सने मुंबई इंडियन्ससमोर 151 धावांचे लक्ष्य ठेवले. तर लक्ष्याचा पाठलाग करताना मुंबई इंडियन्स संघ 11 षटकात 9 बाद 129 धावा करू शकला.
Leave a Reply