रणवीर सिंहच्या ‘धुरंधर’ या चित्रपटाने बॉक्स ऑफिसवर जबरदस्त यश मिळवल्यानंतर त्याच्या सीक्वेलविषयी प्रेक्षकांमध्ये प्रचंड उत्सुकता निर्माण झाली होती. अखेर मंगळवारी 3 फेब्रुवारी रोजी ‘धुरंधर 2’चा टीझर प्रदर्शित झाला. या टीझरमधील धमाकेदार अॅक्शन पाहिल्यानंतर चित्रपटाविषयीची उत्सुकता आणखी शिगेला पोहोचली आहे. आता लवकरात लवकर ट्रेलर आणि त्यानंतर चित्रपटसुद्धा प्रदर्शित करा, अशी भावना नेटकऱ्यांकडून व्यक्त करण्यात आली. फक्त प्रेक्षकच नाही तर फिल्म इंडस्ट्रीतील अनेक कलाकारांनीही या टीझरचं कौतुक केलं आहे. अशातच प्रसिद्ध दिग्दर्शक राम गोपाल वर्माने ‘धुरंधर 2’च्या टीझरबद्दल लिहिलेली पोस्ट सध्या सोशल मीडियावर चर्चेत आली आहे.
‘धुरंधर 2’चा टीझर शेअर करत राम गोपाल वर्माने लिहिलं, ‘हा सूड नाही, हा आदित्य धरचा राग आहे. मला त्या लोकांवर दया येते जे याच्या मार्गात येतील. R I P (रेस्ट इन पीस).’ या पोस्टमधून त्याने ‘टॉक्सिक’ या आगामी चित्रपटाच्या निर्मात्यांना मोठा इशारा दिल्याचं म्हटलं जात आहे. कारण 19 मार्च रोजीच आदित्य धर दिग्दर्शित ‘धुरंधर 2’ या चित्रपटासोबतच साऊथ सुपरस्टार यशचा बहुचर्चित ‘टॉक्सिक’सुद्धा थिएटरमध्ये प्रदर्शित होणार आहे.
विशेष म्हणजे ‘धुरंधर’चा पहिला भाग फक्त हिंदी भाषेतच प्रदर्शित झाला होता, तरीसुद्धा या चित्रपटाने बॉक्स ऑफिसवर फक्त हिंदी भाषेतच 1000 कोटी रुपयांची कमाई करत अल्लू अर्जुनच्या ‘पुष्पा 2’चा रेकॉर्ड मोडला होता. आता ‘धुरंधर 2’ हा चित्रपट पॅन-इंडिया म्हणजेच हिंदीसोबतच तेलुगू, कन्नड, तमिळ आणि मल्याळम या दाक्षिणात्य भाषांमध्येही प्रदर्शित होणार आहे. त्यामुळे या चित्रपटाची यशच्या ‘टॉक्सिक’ला मोठी टक्कर असेल.
This is not REVENGE , it’s @AdityaDharFilms RAMPAGE..I pity the ones who will come in it’s way .. R I P https://t.co/iCZpl70wTm
— Ram Gopal Varma (@RGVzoomin) February 3, 2026
‘धुरंधर’ने जगभरात तब्बल 1300 कोटी रुपयांचा गल्ला जमवला आहे. यामध्ये रणवीर सिंहसोबतच अक्षय खन्ना, अर्जुन रामपाल, संजय दत्त, आर. माधवन, राकेश बेदी आणि सारा अर्जुन यांच्या भूमिका आहेत. रणवीरच्या करिअरमधील हा सर्वांत मोठा आणि ब्लॉकबस्टर चित्रपट ठरला आहे. बॉक्स ऑफिसवर या चित्रपटाने अनेक नवे विक्रम रचले आहेत.
‘धुरंधर 2 : द रेव्हेंज’च्या टीझरमध्ये रणवीर सिंहचा 2.0 अंदाज पहायला मिळतोय. या टीझरची सुरुवातच हिंसक दृश्याने होते आणि पुढेही अशी बरीच दृश्ये पहायला मिळतात, ज्यामुळे अंगावर अक्षरश: काटा येतो. रणवीर सिंह हा हमजा कसा बनला, या प्रवासाची झलक या टीझरमध्ये दिसतेय. त्याचसोबत रेहमान डकैतच्या मृत्यूनंतर संपूर्ण कराचीवर त्याचं राज्य कसं निर्माण होतं आणि त्यासाठी तो काय-काय करतो, हे सर्व यात दाखवण्यात आलं आहे. यामध्ये अर्जुन रामपाल, आर. माधवन आणि संजय दत्त यांच्या भूमिकांचीही झलक पहायला मिळतेय.
Leave a Reply