पाकिस्तान सुपर लीग 2026 स्पर्धेत ऑस्ट्रेलियन फलंदाज मार्नस लाबुशेन पहिल्यांदाच खेळणार आहे. असं असताना पहिल्याच पर्वात त्याच्या खांद्यावर कर्णधारपदाची धुरा टाकली आहे. हैदराबाद किंग्समॅन संघाने त्याला कर्णधार म्हणून घोषित केलं आहे. त्याच्या नावाची घोषणा केल्याने क्रीडाप्रेमींना आश्चर्याचा धक्का बसला आहे. कारण मार्नस लाबुशेनकडे टी20 क्रिकेट खेळण्याचा इतका अनुभव नाही. फ्रेंचायझी क्रिकेटमध्ये फक्त बिग बॅश लीग स्पर्धेत खेळला आहे. इतकंच काय तर इंग्लंडच्या टी20 ब्लास्ट स्पर्धेत भाग घेतला होता. मार्नस लाबुशेन हा कसोटी आणि वनडे क्रिकेटमधील एक चांगला खेळाडू आहे. पण टी20 क्रिकेटमध्ये त्याचं कुठेच नाव नाही. त्याने क्रिकेट कारकिर्दीत फक्त 55 टी20 सामने खेळले आहेत. यात त्याने 26.5 च्या सरासरीने 1381 धावा केल्या आहेत. त्याचा स्ट्राईक रेट 126.5 चा आहे. यात त्याने 8 अर्धशतकं ठोकली आहे. पण आंतरराष्ट्रीय टी20 क्रिकेटचा अनुभव काहीच नाही असं म्हंटलं तर वावगं ठरणार नाही. कारण आंतरराष्ट्रीय टी20 क्रिकेटमध्ये फक्त एकच सामना खेळला आहे.
हैदराबाद किंग्समॅन संघात टी20 क्रिकेटमधील अनुभवी आणि दिग्गज फलंदाज ग्लेन मॅक्सवेल आहे. असं असूनही मार्नस लाबुशेनवर विश्वास टाकला आहे. कदाचित मॅक्सवेल या स्पर्धेत सर्व सामने खेळण्याची शक्यता कमी आहे. त्यामुळेच हा निर्णय घेतला असावा. मार्नस लाबुशेनने संपूर्ण स्पर्धेत खेळण्याची ग्वाही दिली आहे. मार्नस लाबुशेनने कसोटी क्रिकेटमध्ये 63 सामने खेळले असून 4694 धावा केल्या आहेत. यात त्याची सरासरी 44 पेक्षा जास्त आहे. तर 11 शतकं ठोकली आहेत. तर वनडे 1871 धावा केल्या असून 2 शतकं आणि 12 अर्धशतकं ठोकली आहेत. लाबुशेनने एक आंतरराष्ट्रीय टी20 सामना खेळला असून त्यात फक्त 2 धावा केल्या आहेत.
हैदराबाद किंग्समॅनचा संघ : मार्नस लाबुशेन (कर्णधार), सैम अय्यूब, आकिफ जावेद, माज सदाकत, ग्लेन मॅक्सवेल, उस्मान खान, मोहम्मद अली, कुसल परेरा, मुहम्मद इरफान खान, हसन खान, शयान जहांगीर, बार्टमॅन, हम्माद आजम, राइली मॅरिडिथ, शरजील खान, आसिफ महमूद, हुनैन शाह, रिजवान महमूद, साद अली आणि तैय्यब आरिफ.
Leave a Reply