South Africa tour of New Zealand 2026: टी20 वर्ल्डकप 2026 स्पर्धा संपल्यानंतर दक्षिण अफ्रिकेचा संघ न्यूझीलंड दौऱ्यावर आहे. या दौऱ्यात दोन्ही संघात पाच सामन्यांची टी20 मालिका होणार आहे. आतापर्यंत दोन सामने झाले असून 1-1 अशी बरोबरी झाली आहे. मालिकेतील पहिला सामना दक्षिण अफ्रिकेने जिंकला होता. त्यामुळे दुसऱ्या सामन्यात कमबॅकचं आव्हान न्यूझीलंडपुढे होते. अखेर त्यात यश आलं आणि न्यूझीलंडने दुसरा टी20 सामना 68 धावांनी जिंकला. न्यूझीलंडने प्रथम फलंदाजी करताना 175 धावा केल्या. या धावांचा पाठलाग करताना दक्षिण अफ्रिकेने 107 धावांवरच नांगी टाकून दिली. न्यूझीलंडने दिलेल्या धावांचा पाठलाग करता अवघ्या 18 धावांच्या अंतरात दक्षिण अफ्रिकेने पाच विकेट गमावले. इतकंच काय तर टॉपचे 6 फलंदाज 20 धावांचा आकडाही गाठू शकले नाहीत. या सामन्यात न्यूझीलंडच्या गोलंदाजांनी भेदक गोलंदाजीचं दर्शन घडवलं.
नाणेफेकीच कौल दक्षिण अफ्रिकेच्या बाजूने लागला आणि प्रथम गोलंदाजी करण्याचा निर्णय घेतला. पण हा निर्णय चुकला. डेवॉन कॉनवेने या सामन्यात जबरदस्त फलंदाजी केली. एका बाजूने धडाधड विकेट पडत असताना दुसऱ्या बाजूने मोर्चा सांभाळला. डेवॉन कॉनवेने 49 चेंडूत 5 चौकार आणि 2 षटकारांच्या मदतीने 60 धावा केल्या. तर निक केलीने 21, मिचेल सँटनरने 20, जोश क्लार्कसनने नाबाद 26 धावांची खेळी केली. त्यामुळे न्यूझीलंडला 175 धावांपर्यंत मजल मारता आली. तसेच विजयासाठी 176 धावांचं आव्हान दिलं. हे आव्हान दक्षिण अफ्रिका सहज गाठेल असं वाटलं होतं. पण तसं झालं नाही. न्यूझीलंडने दक्षिण अफ्रिकेला 107 धावांवर रोखलं.
दक्षिण अफ्रिकेकडून वियान मल्डर आणि कॉनर एस्टरहुइझेन ही जोडी मैदानात उतरली. या जोडीने पहिल्या विकेटसाठी 29 धावांची भागीदारी केली. मात्र त्यानंतर दक्षिण अफ्रिकेचा संघ पत्त्याच्या बंगल्यासारखा कोसळला. न्यूझीलंडच्या बेन सीयर्सने 14 धावा देऊन 3 विकेट काढल्या. मिचेल सँटनरने 2 आणि लॉकी फर्ग्युसनने 3 विकेट घेतल्या. मॅकॉन्की आणि नीशमला प्रत्येकी एक विकेट मिळाली. दक्षिण अफ्रिकेचा मधल्या फळीचे फलंदाज बाद झाल्यानंतर शेवटचे पाच विकेट 18 धावातच पडले. 13 व्या षटकात 89 धावांवर दक्षिण अफ्रिकेची सहावी विकेट पडली. त्यानंतर 15.3 षटकात 107 धावांवर दक्षिण अफ्रिकेचा संपूर्ण संघ तंबूत होता.
Leave a Reply