दक्षिण आफ्रिकेने न्यूझीलंड विरुद्ध पाचव्या आणि अंतिम टी 20i सामन्यात बुधवारी 25 मार्चला 33 धावांच्या फरकाने विजय मिळवला. दक्षिण आफ्रिकेचा हा सलग दुसरा आणि एकूण तिसरा विजय ठरला. दक्षिण आफ्रिकेने यासह ही 5 सामन्यांची मालिका 3-2 अशा फरकाने आपल्या नावावर केली. उभयसंघात चौथ्या सामन्यानंतर मालिका 2-2 ने बरोबरीत होती. त्यामुळे पाचवा आणि अंतिम सामना जिंकून दोन्ही संघांना मालिका आपल्या नावावर करण्याची बरोबरीची संधी होती. मात्र दक्षिण आफ्रिकेने मैदान मारलं. त्यामुळे यजमान न्यूझीलंडवर मायदेशात मालिका गमावण्याची वेळ ओढावली.
दक्षिण आफ्रिकेने 20 ओव्हरमध्ये 4 विकेट्स गमावून 187 धावा केल्या होत्या. त्यामुळे न्यूझीलंडला मालिका जिंकण्यासाठी 188 धावांची गरज होती. मात्र दक्षिण आफ्रिकेच्या गोलंदाजांसमोर न्यूझीलंडला 20 ओव्हरमध्ये 8 विकेट्स गमावून 154 धावांपर्यंतच पोहचता आलं. न्यूझीलंडने अशाप्रकारे सामन्यासह मालिका गमावली.
सामन्यात काय झालं?
न्यूझीलंडने टॉस जिंकून दक्षिण आफ्रिकेला बॅटिंगसाठी भाग पाडलं. दक्षिण आफ्रिकेने या संधीचा पूर्ण फायदा घेतला. दक्षिण आफ्रिकेच्या पहिल्या 5 फलंदाजांनी जबरदस्त बॅटिंग केली. टॉनी डी झॉर्जी 12, वियान मुल्डर 31, रुबीन हरमन 39 आणि डियान फॉरेस्टर याने 21 धावा करत महत्त्वपूर्ण योगदान दिलं. कॉनर एस्टरहुइझेन याने सर्वाधिक आणि चाबूक खेळी केली.
एस्टरहुइझेन याने फक्त 33 बॉलमध्ये 227.27 च्या स्ट्राईक रेटने 75 रन्स केल्या. एस्टरहुइझेनने या खेळीत 6 सिक्स आणि 5 फोर लगावले. त्यामुळे दक्षिण आफ्रिकेला 187 धावांपर्यंत मजल मारता आली. न्यूझीलंडकडून बेन सियर्स याने सर्वाधिक 2 विकेट्स मिळवल्या.
न्यूझीलंडची बॅटिंग
न्यूझीलंडने विजयी धावांचा पाठलाग करताना पूर्ण ओव्हर खेळून काढल्या. न्यूझीलंडच्या फलंदाजांना चांगली सुरुवातही मिळाली. मात्र त्यापैकी एकालाही त्या खेळीला मोठ्या आकड्यात बदलता आलं नाही. न्यूझीलंडसाठी बेवन जेकब्स याने सर्वाधिक 36 धावा केल्या. टीम रॉबिन्सन 25, कॅप्टन जेम्स निशाम 24 आणि डेन क्लीव्हर याने 22 धावांचं योगदान दिलं. मात्र त्याचा काही फायदा झाला नाही. दक्षिण आफ्रिकेसाठी गेराल्ड कोएत्झी, वियान मुल्डर आणि ओटनील बार्टमॅन याने तिघांनी प्रत्येकी 2-2 विकेट्स मिळवल्या. तर केशव महाराज याने 1 विकेट मिळवली.
कॉनर एस्टरहुइझेन मॅन ऑफ द सीरिज
दरम्यान कॉनर एस्टरहुइझेन हा मालिकावीर ठरला. कॉनरने या मालिकेत सर्वाधिक 200 धावा केल्या. तर डेव्हॉन कॉनव्हे या मालिकेत सर्वाधिक 100 धावा करणारा दुसरा फलंदाज ठरला. गेराल्ड कोएत्झी याने या मालिकेत सर्वाधिक विकेट्स मिळवल्या. दक्षिण आफ्रिकेच्या गेराल्डने 5 सामन्यांमध्ये 8 विकेट्स मिळवल्या. तर न्यूझीलंडसाठी बेन सियर्स यानही 8 विकेट्स घेण्याची कामगिरी केली.
Leave a Reply