भारतीय क्रिकेट संघाने कर्णधार सूर्यकुमार यादव याच्या घरच्या मैदानात अर्थात वानखेडे स्टेडियममध्ये आयसीसी टी 20i वर्ल्ड कप 2026 स्पर्धेतील सेमी फायनलमध्ये इंग्लंडवर मात केली. टीम इंडियाने 254 रन्सचा पाठलाग करणाऱ्या इंग्लंडला 246 रन्सवर रोखलं. भारताने अशाप्रकारे हा सामना 7 धावांनी जिंकत वर्ल्ड कप स्पर्धेच्या अंतिम फेरीत प्रवेश मिळवला. टीम इंडियाची इंग्लंडला पराभूत करुन अंतिम फेरीत पोहचण्याची ही सलग आणि एकूण दुसरी वेळ ठरली आहे. टीम इंडियाने याआधी 2024 मध्येही इंग्लंडव मात करत फायनलचं तिकीट मिळवलं होतं. त्यामुळे इंग्लंडचा 2024 च्या पराभवाची परतफेड करण्याचा प्रयत्न होता. मात्र इंग्लंड 7 धावांपासून दूर राहिली आणि सूर्यासेनेने मैदान मारलं.
टीम इंडियाने उपांत्य फेरीतील या विजयासह आयसीसी टी वर्ल्ड कप 2026 च्या ट्रॉफीवर एक हात ठेवला आहे. आता न्यूझीलंड आणि टीम इंडियापैकी ही ट्रॉफी कोण उंचावणार? हे रविवारी 8 मार्चला निश्चित होणार आहे. या वर्ल्ड कप स्पर्धेच्या 10 व्या पर्वातील अंतिम सामन्यात टीम इंडियासमोर न्यूझीलंडचं आव्हान असणार आहे. हा सामना टीम इंडिया जिंकणार का? याकडे चाहत्यांचं लक्ष असणार आहे.
टीम इंडियाची न्यूझीलंड विरुद्धची आकडेवारी चिंताजनक
टीम इंडियाची टी 20i वर्ल्ड कप स्पर्धेच्या इतिहासातील न्यूझीलंड विरुद्धची आकडेवारी चिंताजनक असल्याचं स्पष्ट होतं. टी 20i वर्ल्ड कप स्पर्धेच्या इतिहासात न्यूझीलंड विरुद्ध टीम इंडिया एकूण 3 वेळा आमनेसामने आले आहेत. न्यूझीलंडने टीम इंडियाला तिन्ही वेळा पराभूत केलं. आहे. त्यामुळे आता न्यूझीलंड विजयी चौकार लगावत पहिल्यांदा वर्ल्ड कप जिंकणार की यजमान संघ सलग दुसऱ्यांदा विश्वविजेता होण्याचा कारनामा करणार? हे पाहणं औत्सुक्याचं ठरणार आहे.
न्यूझीलंड 2025 ची परतफेड करणार?
दरम्यान टीम इंडियाने बरोबर वर्षभराआधी रोहित शर्मा याच्या नेतृत्वात आयसीसी चॅम्पियन्स ट्रॉफीवर नाव कोरलं होतं. टीम इंडियाने तेव्हा न्यूझीलंडला अंतिम फेरीत पराभूत करुन हा विजय साकारला होता. त्यामुळे आता न्यूझीलंडचा त्या पराभवाची वसूली करुन ट्रॉफी कॅबिनेटमध्ये न्यूझीलंडचा पहिलावहिला टी 20i वर्ल्ड कप ठेवण्याचा प्रयत्न असणार आहे. आता न्यूझीलंड या प्रयत्नात किती यशस्वी ठरते? हे सामन्याच्या निकालानंतरच स्पष्ट होईल.
Leave a Reply