IND vs NZ : तिलक वर्मा दुखापतीमुळे पहिल्या 3 टी 20I सामन्यांतून बाहेर, भारताला मोठा झटका

टीम इंडिया विरुद्ध न्यूझीलंड  यांच्यात (India vs New Zealand) एकदिवसीय आणि टी 20I मालिका खेळवण्यात येणार आहे. न्यूझीलंडच्या भारत दौऱ्याची सुरुवात ही एकदिवसीय मालिकेने होणार आहे. उभयसंघातील 3 सामन्यांच्या एकदिवसीय मालिकेला 11 जानेवारीपासून सुरुवात होणार आहे. त्यानंतर 21 जानेवारीपासून टी 20I मालिकेचा थरार रंगणार आहे. या मालिकेत एकूण 5 सामने खेळवण्यात येणार आहेत. भारताची आगामी टी 20I वर्ल्ड कपआधीची ही शेवटची मालिका असणार आहे. त्यामुळे भारतासाठी ही मालिका फार महत्त्वाची आहे. मात्र त्याआधी भारताला मोठा झटका लागला आहे. भारताच्या मॅचविनर आणि युवा फलंदाजाला दुखापतीमुळे न्यूझीलंड विरुद्धच्या टी 20I मालिकेतील (India vs New Zealand T20I Series 2026)  काही सामन्यांत खेळता येणार नाही. याबाबतची माहिती बीसीसीआयने प्रसिद्धीपत्रकाद्वारे दिली आहे.

भारताचा मधल्या फळीतील प्रमुख फलंदाज तिलक वर्मा (Tilak Varma Injury) याला दुखापतीमुळे न्यूझीलंड विरूद्धच्या पहिल्या 3 टी 20I सामन्यात खेळता येणार नाही. तिलक पहिल्या 3 सामन्यांतून बाहेर झाला आहे. तर उर्वरित 2 सामन्यांत खेळणार की नाही? हे त्याच्या दुखापतीवर अवलंबून असेल, असं बीसीसीआयने प्रसिद्धीपत्रकात म्हटलंय. त्यामुळे आता टीम इंडियाच्या अडचणीत वाढ झाली आहे.