Best Places Visit in March: तुम्ही फिरण्याचा (ट्रिप) प्लॅन आखतायेत का? मग ही माहिती नक्की वाचा. मार्च महिना हा भारतातील पर्यटनासाठी अतिशय खास असतो. या काळात हिवाळ्याची थंडी ओसरलेली असते आणि उन्हाळ्याचा तडाखा अजून सुरू झालेला नसतो. आल्हाददायक हवामान, निसर्गाचे बहरलेले रूप आणि विविध सणांची रेलचेल यामुळे या महिन्यात फिरण्याची एक वेगळीच मजा असते. चला तर मग जाणून घेऊया.
भारतातील मार्च महिन्यासाठी काही निवडक आणि खास डेस्टिनेशन्स खालीलप्रमाणे आहेत.
1. ऋषिकेश, उत्तराखंड
मार्चमध्ये ऋषिकेशचे हवामान अत्यंत प्रसन्न असते. गंगेच्या काठावर योग साधना करण्यासाठी आणि रिव्हर राफ्टिंगसारख्या साहसी खेळांसाठी हा काळ उत्तम आहे. येथे तुम्ही बंजी जंपिंग आणि कॅम्पिंगचा आनंदही घेऊ शकता.
2. जयपूर आणि उदयपूर, राजस्थान
राजस्थानातील कडक उन्हाळा सुरू होण्यापूर्वी मार्च महिना हे राज्य फिरण्यासाठी शेवटची चांगली संधी असते.
जयपूर: येथील किल्ले, राजवाडे आणि रंगीबेरंगी बाजारपेठा पाहण्यासाठी मार्चमधील हवामान अनुकूल असते.
उदयपूर: ‘तलावांचे शहर’ म्हणून ओळखल्या जाणाऱ्या उदयपूरमध्ये संध्याकाळच्या वेळी लेक पिचोलामध्ये बोटिंग करणे खूप सुखद वाटते.
3. मुन्नार, केरळ
तुम्हाला निसर्गाच्या सानिध्यात राहायचे असेल, तर मुन्नार हा सर्वोत्तम पर्याय आहे. हिरवेगार चहाचे मळे, धुके आणि आल्हाददायक थंडी यामुळे हे ठिकाण हनिमून कपल्स आणि फॅमिली ट्रिपसाठी लोकप्रिय आहे.
4. गोवा
नोव्हेंबर-डिसेंबरमधील गर्दी मार्चमध्ये कमी झालेली असते, ज्यामुळे तुम्हाला गोव्यातील समुद्रकिनाऱ्यांचा शांतपणे आनंद घेता येतो. या काळात हॉटेल्सचे दरही तुलनेने कमी असतात आणि हवामानही फिरण्यासाठी योग्य असते.
5. सिक्कीम आणि गंगटोक
मार्चमध्ये सिक्कीममध्ये वसंत ऋतूचे आगमन होते. डोंगररांगांवर उमललेली फुले आणि हिमालयीन शिखरांचे स्पष्ट दर्शन हे येथील मुख्य आकर्षण असते. साहसी पर्यकांसाठी हे एक उत्तम ठिकाण आहे.
6. महाबळेश्वर
महाराष्ट्रात राहणाऱ्यांसाठी महाबळेश्वर हे मार्चमधील सर्वोत्तम ठिकाण आहे. येथील स्ट्रॉबेरीचा हंगाम या काळात जोमात असतो आणि येथील पॉईंट्सवरून दिसणारा सह्याद्रीचा नजारा मन मोहून टाकतो.
मार्चमध्ये फिरण्याचे फायदे
आल्हाददायक हवामान: कडक ऊन किंवा थंडी नसल्यामुळे दिवसभर फिरणे सोपे जाते. होळी उत्सव: मार्च महिन्यात होळीचा सण येतो. मथुरा, वृंदावण किंवा आनंदपूर साहिबमधील ‘होला मोहल्ला’ उत्सव अनुभवणे हा एक अविस्मरणीय अनुभव असू शकतो.
बजेट ट्रॅव्हल: सीझन संपत आल्यामुळे अनेक ठिकाणी ट्रॅव्हल आणि निवासावर सवलती मिळू शकतात.
Leave a Reply