उपमुख्यमंत्री अजित पवार यांच्या विमानाला बुधवारी भीषण अपघात झाला, या अपघातामध्ये अजित पवार यांच्यासह पाच जणांचा मृत्यू झाला. आज अजित पवार यांच्यावर बारामतीमध्ये शोकाकूल वातावरणात अंत्यसंस्कार करण्यात आले. आपल्या नेत्याला निरोप देण्यासाठी बारामतीमध्ये कार्यकर्त्यांनी प्रचंड गर्दी केली होती. प्रत्येक कार्यकर्त्याच्या डोळ्यात पाणी होतं. दरम्यान अजित पवार यांच्या निधनामुळे संपूर्ण राज्यावर शोककळा पसरली आहे. आज अनेक शहरांमध्ये बाजारपेठा बंद ठेवून अजित पवार यांना श्रद्धांजली वाहण्यात आली. पुणे, बीड, छत्रपती संभाजीनगरसह अनेक शहरांमध्ये आज बाजारपेठा बंद ठेवण्यात आल्या आहेत.
राज्यात कुठे कुठे बंद?
राज्याचे उपमुख्यमंत्री अजित पवार यांच्या निधनाने संपूर्ण महाराष्ट्र दुःखात आहे. कालपासून सगळीकडे शोकाकुल वातावरण पहायला मिळत आहे. आज छत्रपती संभाजीनगर शहरातील कॅनॉट परिसरातील अनेक व्यापाऱ्यांनी आपली दुकानं बंद ठेऊन अजित पवार यांना श्रद्धांजली अर्पण केली आहे. राज्यात तीन दिवसांचा दुखवटा जाहीर करण्यात आला आहे.
इगतपुरीमध्ये बंद
दरम्यान अजित पवार यांच्या निधनामुळे राज्यभरात हळहळ व्यक्त होत आहे. इगतपुरीतही व्यापारी संघटनेकडून आज शहरात बंदची हाक देण्यात आलेली आहे. इगतपुरीतील भाजी मंडई कायमच गजबजलेलं असतं मात्र आज मार्केट बंद असल्याने या ठिकाणी शुकशुकाट पहायला मिळत आहे.
माढ्यात बंद
सोलापूरच्या माढ्यात देखील व्यापाऱ्यांनी आपली दुकानं बंद ठेवली आहेत, सर्वत्र कडकडीत बंद पाळण्यात आला आहे. सर्वपक्षीय नेत्यांकडून अजित पवार यांना श्रद्धांजली अर्पण करण्यात आली आहे.
राज्याचे उपमुख्यमंत्री अजित पवार यांचं अपघाती निधन झालं. त्यांच्यावर
आज शासकीय इतमामात अंत्यसंस्कार करण्यात आले. दरम्यान अहिल्यानगरमधील
नेप्ती उपबाजार समिती व्यापारी आणि शेतकऱ्यांनी बंद ठेवत, अजित पवार यांना श्रद्धांजली अर्पण केली.
जळगाव जिल्ह्यातही बंद
उपमुख्यमंत्री अजित पवार यांचं विमान अपघातामध्ये निधन झालं आहे, अजित पवार यांच्यावर आज अंत्यसंस्कार करण्यात आले, दरम्यान आज जळगाव जिल्ह्यातही अनेक ठिकाणी बाजारपेठा बंद असल्याच्या पहायला मिळाल्या. मुक्ताईनगर, बोदवड, वरणगाव शहरात आज बाजारपेठा बंद ठेवण्यात आल्या आहेत.
Leave a Reply