विविध ओटीटी प्लॅटफॉर्म्सवर दर आठवड्याला नवनवीन कंटेंट प्रेक्षकांच्या भेटीला येतो. रोमँटिक, क्राइम, सस्पेन्स थ्रिलर, रोमँटिक कॉमेडी, कॉमेडी अशा विविध जॉनरचे चित्रपट आणि वेब सीरिज या प्लॅटफॉर्म्सवर सहज उपलब्ध असतात. असाच एक क्राइम थ्रिलर चित्रपट सध्या ओटीटीवर ट्रेंड होतोय. या चित्रपटाची कथा इतकी दमदार आहे की, त्यावरून तुमची नजरच हटणार नाही. जर तुम्हाला सस्पेन्स आणि ब्लॅक कॉमेडी आवडत असेल, तर नक्कीच तुम्हाला हा चित्रपट आवडू शकतो. या चित्रपटाचं नाव आहे ‘भ्रमम’. जिओ हॉटस्टार या ओटीटी प्लॅटफॉर्मवर सध्या हा चित्रपट ट्रेंडमध्ये आहे. ट्रेंडिंग लिस्टमध्ये हा चित्रपट पाचव्या स्थानी आहे आणि प्रेक्षक या क्राइम थ्रिलरला खूप पसंत करत आहेत.
‘भ्रमम’ हा चित्रपट ‘अंधाधुन’ या बॉलिवूड चित्रपटाचा अधिकृत मल्याळम रिमेक आहे. 2018 मध्ये हा चित्रपट प्रदर्शित झाला होता आणि त्यामध्ये आयुषमान खुराना, तब्बू आणि राधिका आपटे यांच्या भूमिका होत्या. जर तुम्ही ‘अंधाधुन’ पाहिला असेल तर हा मल्याळम रिमेक का पहावा, असा प्रश्न नक्कीच तुम्हाला पडला असेल. तर याचं उत्तर म्हणजे, ‘भ्रमम’मध्ये बरंच काही नवीन दाखवण्यात आलं आहे. या चित्रपटाची कथा रे मॅथ्युजच्या (पृथ्वीराज सुकुमारन) अवतीभवती फिरते, जो एक पियानोवादक असतो. जगासमोर तो आंधळं असल्याचं नाटक करतो, जेणेकरून लोकांनी त्याच्याकडे दयेच्या भावनेनं पहावं आणि त्याला संगीताच्या चांगल्या संधी मिळाव्यात.
कथेत पुढे रे मॅथ्युजची भेट अन्नाशी (राशी खन्ना) होते. अन्ना त्याला त्याच्या वडिलांच्या रेस्टॉरंटमध्ये पियानो वाजवण्यासाठी पाठवते. त्यानंतर तिथे त्याची भेट उदय कुमारशी होते, जो त्याला त्याच्या घरी पियानो वाजवण्यासाठी आमंत्रित करतो. जेव्हा तो त्याच्या घरी पोहोचतो, तेव्हा तिथे तो हत्येच्या घटनेचा साक्षीदार होतो आणि इथूनच कथेत मोठं वळण येतं.
भ्रमम या चित्रपटात पृथ्वीराज सुकुमारन, राशी खन्ना यांच्यासोबत उन्नी मुकुंदनने मुख्य भूमिका साकारली आहे. हा चित्रपट 2021 मध्ये प्रदर्शित झाला होता. त्यानंतर तो प्राइम व्हिडीओ या ओटीटी प्लॅटफॉर्मवरही स्ट्रीम करण्यात आला होता. आता तो जियो हॉटस्टारवर प्रेक्षकांच्या भेटीला आला आहे.
Leave a Reply