बॉलिवूडमध्ये काही चित्रपट असे असतात जे बॉक्स ऑफिसवर फारसं यश मिळवू शकत नाहीत पण प्रेक्षकांच्या मनावर कायमचा ठसा उमटवतात. 1998 साली प्रदर्शित झालेला ‘दुश्मन’ हा असाच एक थरारपट होता, ज्याने थिएटरमध्ये भीती, वेदना आणि सूडाची तीव्र भावना निर्माण केली.
या चित्रपटात काजोलने दुहेरी भूमिका साकारली होती. एका निरागस बहिणीपासून सूड घेणाऱ्या कठोर स्त्रीपर्यंतचा तिचा प्रवास अत्यंत प्रभावी ठरला. तिच्या किंकाळ्या आणि डोळ्यांतील रागाने प्रेक्षक अक्षरशः हादरले होते.
दमदार स्टारकास्ट, तरीही अपयश
चित्रपटात संजय दत्तने एका आर्मी अधिकाऱ्याची भूमिका साकारली होती, जो नायिकेला मदत करतो. त्याचबरोबर आशुतोष राणा यांनी ‘गोकुल पंडित’ या खलनायकाच्या भूमिकेत भयानक अभिनय केला. त्यांच्या या भूमिकेसाठी त्यांना फिल्मफेअरचा सर्वोत्कृष्ट खलनायकाचा पुरस्कारही मिळाला. आजही हे कॅरेक्टर हिंदी सिनेमातील सर्वात भीतीदायक भूमिकांपैकी एक मानले जाते.
तनुजा चंद्रा दिग्दर्शित या चित्रपटाची कथा दोन जुळ्या बहिणींच्या आयुष्याभोवती फिरते. एका बहिणीवर झालेल्या भयानक अत्याचारानंतर दुसरी बहिण सूड उगवण्याचा निर्धार करते. हा चित्रपट हॉलिवूडच्या ‘I Spit on Your Grave’/‘Eye for an Eye’ सारख्या कथांपासून प्रेरित असला तरी भारतीय पार्श्वभूमीवर प्रभावीपणे मांडण्यात आला आहे.
बॉक्स ऑफिसवर अपयश
सुमारे 4 कोटींच्या बजेटमध्ये तयार झालेल्या या चित्रपटाने भारतात सुमारे 5.62 कोटींची कमाई केली तर जगभरात सुमारे 10 कोटींची कमाई केली. मात्र, अपेक्षेप्रमाणे नफा न मिळाल्यामुळे हा चित्रपट ‘फ्लॉप’ ठरला. त्या काळात कुछ कुछ होता है आणि घातक सारख्या चित्रपटांची क्रेझ अधिक होती. त्यामुळे हा गंभीर थ्रिलर चित्रपट मागे पडला.
बॉक्स ऑफिसवर अपयशी ठरूनही ‘दुश्मन’ हा चित्रपट आजही त्याच्या दमदार कथानक आणि अभिनयासाठी ओळखला जातो. काजोल स्वतःही या चित्रपटाला तिच्या कारकिर्दीतील सर्वात भीतीदायक आणि आव्हानात्मक भूमिका मानते. हा चित्रपट हे सिद्ध करतो की, यश केवळ कमाईत मोजलं जात नाही. काही चित्रपट त्यांच्या प्रभावामुळेच अमर होतात.
Leave a Reply