हॉरर कंटेंट पाहताना तुमचीही झोप उडते का? पण तरीही त्यात एक वेगळीच मजा येते, असं वाटतं? मग ही सीरिज तुमच्यासाठीच आहे. ही वेबसीरिज पाहिल्यानंतर रात्री झोपताना पाठीमागे कोणीतरी उभा आहे का, दाराआडून कोण बघतंय का, असा सतत भास होईल. भीतीचा हा अनुभव खरंच अविस्मरणीय आहे.
हॉलिवूडमध्ये सर्वाधिक लोकप्रिय आणि गाजलेली ही सीरिज आहे 'द वॉकिंग डेड' (The Walking Dead). २०१० मध्ये सुरू झालेल्या या सीरिजची क्रेझ आजही कायम आहे. एकूण ११ सीझन आणि तब्बल १७७ एपिसोड्स असलेली ही मालिका प्रेक्षकांना झोम्बी अपोकॅलिप्सच्या भयानक जगात घेऊन जाते.
रॉबर्ट किर्कमॅन यांच्या प्रसिद्ध कॉमिक बुकवर आधारित असलेली ही कथा फक्त एक साधी गोष्ट नाही, तर चालत्या-फिरत्या प्रेतांचं (झोम्बींचं) एक असं भयावह जग आहे, जिथून सुटका मिळणं जवळपास अशक्य आहे.
कथेच्या सुरुवातीला मुख्य पात्र रिक ग्राइम्स (पोलिस अधिकारी) कोमातून जागा होतो आणि त्याला धक्काच बसतो. संपूर्ण जग एका भयंकर व्हायरसने उद्ध्वस्त झालं आहे. माणसं आता माणसं उरलेली नाहीत, तर नरमांस खाणारे झोम्बी बनली आहेत. शहरं ओस पडली आहेत, रस्त्यावर फक्त मृतदेह फिरत आहेत.
रिक आणि त्याचे काही साथीदार या नरकातून वाचण्यासाठी, एकमेकांना वाचवण्यासाठी आणि स्वतःचं अस्तित्व टिकवण्यासाठी कशी संघर्ष करतात, याचा रोमांचक आणि अंगावर काटा आणणारा प्रवास या सीरिजमध्ये दाखवला आहे.
'द वॉकिंग डेड' केवळ कथानकामुळे नाही, तर त्यातील कलाकारांच्या जबरदस्त अभिनयामुळेही जगभरात गाजली. IMDb वर या सीरिजला ८.१ चं उत्तम रेटिंग मिळालं आहे. नॉर्मन रीडस (डॅरिल), मेलिसा मॅकब्राइड (कॅरोल), लॉरेन कोहन (मॅगी) आणि जेफ्री डीन मॉर्गन (नेगन) यांसारख्या दिग्गज कलाकारांनी यात अफलातून काम केलं आहे. विशेषतः जेफ्री डीन मॉर्गनच्या एन्ट्रीने आणलेला ट्विस्ट आजही प्रेक्षकांना धक्का देतो.
जर तुमच्यात १७७ एपिसोड्स पाहण्याचं धाडस असेल आणि झोम्बींच्या भीतीचा सामना करण्याची तयारी असेल, तर ही सीरिज तुम्ही नेटफ्लिक्स वर (किंवा उपलब्ध असलेल्या इतर प्लॅटफॉर्मवर) पाहू शकता.
Leave a Reply