‘सेक्रेड गेम्स’ या गाजलेल्या वेब सीरिजमधअये नवाजुद्दीन सिद्दिकीच्या ऑनस्क्रीन पत्नीची भूमिका साकारलेली मराठमोळी अभिनेत्री राजश्री देशपांडेला कॅन्सरचं निदान झालं आहे. सोशल मीडियावर पोस्ट लिहित तिने याबद्दलची माहिती दिली आहे. राजश्री रुटीन चेकअपसाठी गेली असता तिला ग्रेड 1 ब्रेस्ट कॅन्सरचं निदान झालं. त्यासाठी तिने उपचार घेतले असून नुकतीच तिच्यावर सर्जरीसुद्धा करण्यात आली. त्यानंतर रुग्णालयातील फोटो पोस्ट करत राजश्रीने कॅन्सरशी कशी झुंज दिली, याविषयी सांगितलं.
राजश्री देशपांडेची पोस्ट-
‘तुम्ही ही पोस्ट वाचत आहात, याचा अर्थ असा की मला माझ्या पालकांना सांगण्याची हिंमत झाली आहे की मला इन्फिल्ट्रेटिंग डक्टल कार्सिनोमा (NOS) हा ग्रेड 1 ब्रेस्ट कॅन्सर असल्याचं निदान झालं आहे. आता तुम्हा सर्वांना हे कळण्याची वेळ झाली आहे. सुदैवाने रुटीन चेकअपदरम्यान त्याचं निदान झाल्याने त्याच्याशी झुंज देण्याची संधी मिळाली. असंख्य टेस्ट आणि सर्जरीमुळे हा प्रवास बऱ्याच चढउतारांचा होता, पण प्रत्येकाच्या प्रेमामुळे मी याचा सामना करू शकले. सर्जरीनंतर आई आणि पप्पांचा चेहरा पाहून माझ्यातील भीतीचं एका अतूट शक्तीत रुपांतर झालं. प्रत्येकाने दिलेल्या पाठिंब्यामुळे मला प्रचंड बळ मिळालं आहे. आता मी त्यातून बरी होत असून लवकरच रुग्णालयातून घरी परतणार आहे,’ असं राजश्रीने लिहिलं आहे.
View this post on Instagram
View this post on Instagram
राजश्री अभिनयासोबतच तिच्या सामाजिक कार्यासाठीही ओळखली जाते. 2026 मध्ये बरीच सामाजिक कामं मार्गी लावण्याचा तिचा प्लॅन होता, आणि ठरल्याप्रमाणे ते पूर्ण करणार असल्याचा मानस तिने व्यक्त केला आहे. इन्स्टाग्रामवरील आणखी एका पोस्टमध्ये राजश्रीने लिहिलंय, ‘2026 ची सुरुवात ग्रामीण भागातील आणखी दोन शाळांचं नियोजन, नदीचा आणखी एक भाग पुनरुज्जीवित करणं आणि काही अत्यंत प्रतिभावान लोकांच्या कथा शूट करण्याच्या प्लॅनिंगपासून झाली होती. उद्देश आणि स्वप्नांनी मी सज्ज होते. पण यात काहीही बदलणार नाही. हे सर्व शक्य होईल आणि तेही ठरल्यापेक्षा अधिक चांगल्या मार्गांनी. मी वचन देते. या धाडसी प्रवासात मी विश्वास, धैर्य आणि प्रेमाने भरलेल्या हृदयाने पाऊल ठेवत आहे. हा फक्त एक धडा आहे, संपूर्ण कहाणी नाही. आता कॅन्सरशी लढा दिलेली, सामाजिक कार्यकर्ती आणि माणूस म्हणून हे सर्व अधिक महत्त्वाचं झालं आहे. ब्रेस्ट कॅन्सरबद्दल जागरुकता पसरवण्यासाठी आता बऱ्याच ग्राऊंड वर्कची गरज आहे.’
Leave a Reply