कायद्याची वर्दी घालणाऱ्यांना समाजाचा रक्षक मानले जाते. पण जेव्हा स्वतः वर्दीधारीच वादात सापडतात, तेव्हा संपूर्ण यंत्रणेवरच प्रश्नचिन्ह उभे राहतात. बंगळुरूतून समोर आलेला हा प्रकारही असाच आहे. येथे एक पोलिस इन्स्पेक्टरवर आरोप आहे की, शहरातील कथित ‘लेडी डॉन’शी जवळीक साधण्याच्या नादात त्यांनी मर्यादा पूर्णपणे ओलांडल्या. ही कहाणी केवळ मेसेज आणि ऑडिओ क्लिप्सची नाही, तर जनतेने पोलिसांवर ठेवलेल्या विश्वासाचीही आहे. आणि तो विश्वास डळमळीत झाला की, प्रश्न अधिक गंभीर होतात.
एका रिपोर्टनुसार, सोशल मीडियावर काही ऑडिओ क्लिप्स आणि चॅट्स व्हायरल झाल्यानंतर हा वाद चांगलाच तापला. या ऑडिओमध्ये इन्स्पेक्टर कथितपणे त्या महिलेला ‘सर’ म्हणू नका, फक्त ‘पापू’ म्हणून बोलवा, असा आग्रह करताना ऐकू येत आहेत. महिलेनं हे संदेश आपत्तिजनक असल्याचे सांगितले असून, तक्रार केल्यास धमक्या दिल्याचा दावाही केला आहे. मात्र, पोलिस सूत्रे याला ८ वर्ष जुने प्रकरण आणि कट रचला असल्याचे म्हणत आहेत.
इन्स्पेक्टर पापन्नांचा ‘रंगीला’ ऑडिओ व्हायरल
हे संपूर्ण प्रकारण बंगळुरूच्या कोनानकुंटे भागाशी संबंधित आहे. येथे तैनात इन्स्पेक्टर पापन्ना यांच्यावर यशस्विनी गौडा नावाच्या महिलेशी अनुचित जवळीक साधण्याचा आरोप आहे. व्हायरल झालेल्या ऑडिओमध्ये इन्स्पेक्टर तिला ‘डालू’ म्हणून हाक मारताना आणि स्वतःला ‘पापू’ म्हणवून घेण्याची विनंती करताना ऐकू येतात. इतकेच नव्हे तर, तिला भेटायला येण्याची आणि घरी येण्याचीही बोलणी करत आहेत.
महिलेच्या म्हणण्यानुसार, तिने हे सर्व प्रस्ताव नाकारले, त्यानंतर तिला सतत त्रास दिला गेला. दुसरीकडे, पोलिस सूत्रांचे म्हणणे आहे की, हे मेसेज सुमारे ८ वर्ष जुने आहेत आणि इन्स्पेक्टरला फसवण्यासाठी कट रचला गेला असू शकतो. ऑडिओ क्लिप्समध्ये छेडछाडही झाली असण्याची शक्यता त्यांनी व्यक्त केली आहे. बंगळुरू पोलिस कमिशनर यांनी या प्रकरणाची प्राथमिक चौकशी करण्याचे आदेश दिले आहेत. मात्र, अद्याप महिलेकडून कोणतीही औपचारिक तक्रार दाखल करण्यात आलेली नाही.
वर्दीवर डाग की कट?
या केसमध्ये चौकशीचा निष्कर्ष अत्यंत महत्त्वाचा ठरणार आहे. कारण यात केवळ एका व्यक्तीची प्रतिमा नव्हे, तर संपूर्ण पोलिस विभागाची विश्वासार्हता धोक्यात आहे. येत्या काही दिवसांत हे स्पष्ट होईल की ‘पापू’ची ही कहाणी खरी आहे की, एक सुनियोजित जाळे.
Leave a Reply