प्रत्येक महिन्याच्या कृष्ण पक्षातील चतुर्थी तिथी अत्यंत विशेष मानली जाते. कारण या तिथील विघ्नहर्ता गणपती यांना समर्पित उपवास केला जातो. चैत्र महिन्यात येणारी पहिली संकष्टी चतुर्थी आहे आणि या चतुर्थीला विकट संकष्टी चतुर्थी म्हटले जाते. या दिवशी भगवान गणेशासाठी विशेष प्रार्थना आणि उपवास केले जातात. विकट हे भगवान गणेशाच्या आठ अष्टविनायक रूपांपैकी एक आहे. नावाप्रमाणेच ही चतुर्थी आयुष्यातील कठिण आणि विकट संकटांचा नाश करणारी मानली जाते.
असे मानले जाते की गणपती देवांच्या या रूपाची पूजा केल्याने ज्ञात आणि अज्ञात अशा सर्व प्रकारच्या भीतींपासून मुक्ती मिळते. शिवाय विकट संकष्टी चतुर्थीच्या पूजेदरम्यान गणपतीला काही प्रिय वस्तू अर्पण केल्या जातात. असा विश्वास आहे की पूजेदरम्यान या वस्तू गणपतीला अर्पण केल्यास गणपती बाप्पा प्रसन्न होतात आणि त्या व्यक्तीच्या जीवनातील सर्व अडथळे दूर करतात. चला तर मग आजच्या लेखात आपण कोणत्या खास गोष्टी गणपती बाप्पाला अर्पण करायच्या ते जाणून घेऊयात.
विकट संकष्टी चतुर्थी कधी आहे
विकट संकष्टी चतुर्थी तिथी 5 एप्रिल रोजी सकाळी 11 वाजून 5 मिनिटांनी सुरू होते. आणि 6 एप्रिल रोजी दुपारी 2 वाजून 10 मिनिटांनी संपते.
विकटा संकष्टी चतुर्थी 2026 पूजा शुभ मुहूर्त
विकट संकष्टी चतुर्थीच्या दिवशी पूजेसाठी सर्वात शुभ वेळ सायंकाळी 06 वाजून 20 मिनिटं ते रात्री 08 वाजून 06 मिनिट हा अमृत काळ आहे.
विकटा संकष्टी चतुर्थीला चंद्र उगवण्याची वेळ
द्रिक पंचांगानुसार विकट संकष्टी चतुर्थीच्या दिवशी चंद्रोदय रात्री09 वाजून 58 मिनिटांनी होईल.
या गोष्टी गणपती बाप्पाला अर्पण करा
पूजेदरम्यान बाप्पाला दुर्वा आणि लाल कुंकू अर्पण करायला विसरू नका. तसेच लाल किंवा पिवळे वस्त्र आणि जानवे देखील अर्पण करा. पूजेदरम्यान 21 दुर्वा अर्पण करा.
नारळ, अख्खी हळद आणि सुपारी अर्पण करणे देखील शुभ मानले जाते. बाप्पाला गोड पदार्थ खूप आवडतात. मोदक, बेसनचे लाडू आणि गोड पुरणपोळी यांसारखे त्याचे आवडते पदार्थ अर्पण करा.
( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)
Leave a Reply