अमेरिका, इस्त्रायल आणि इराणमध्ये भीषण युद्ध सुरू आहे. या युद्धाचा आज 19 वा दिवस आहे. या 19 दिवसांमध्ये अमेरिका आणि इस्त्रायलकडून सुरू असलेल्या हल्ल्यांमुळे इराणचं प्रचंड नुकसान झालं आहे. 28 फेब्रुवारी रोजी इस्त्रायलने इराणवर हल्ला केला आणि या भीषण युद्धाला सुरुवात झाली. दरम्यान युद्धाच्या दुसऱ्याच दिवशी अमेरिका आणि इस्त्रायलने केलेल्या संयुक्त कारवाईमध्ये इराणचे सर्वोच्च नेते आयतुल्ला अली खामेनेई यांचा मृत्यू झाला, त्यानंतर इस्त्रायलने इराणला अशी देखील धमकी दिली होती की, जर इराणने पुन्हा नव्या सर्वोच्च नेत्याची निवड केली तर आम्ही त्याला देखील मारू, दरम्यान त्यानंतर इराणकडून सर्वोच्च नेता म्हणून मोजतबा खामेनेई यांची निवड करण्यात आली. मोजतबा खामेनेई हे देखील या युद्धात गंभीर जखमी झाल्याची माहिती समोर येत आहे.
दरम्यान त्यानंतर इस्त्रायलकडून मंगळवारी इारणवर पुन्हा एअर स्ट्राईक करण्यात आला. या हल्ल्यामध्ये इराणचे वरिष्ठ संरक्षण अधिकारी अली लारीजानी यांचा मृत्यू झाला. मोजतबा खामेनेई हे सध्या जखमी आहेत. आयतुल्ला अली खामेनेई यांच्या मृत्यूनंतर या युद्धाची सर्व सुत्रे हे लारीजानी हेच सांभाळत होते. त्यामुळे लारीजानी यांचा मृत्यू हा इराणसाठी सर्वात मोठा धक्का मानला जात आहे. त्यानंतर बुधवारी इस्त्रायलकडून पुन्हा इराणवर हल्ला करण्यात आला, या हल्ल्यामध्ये इराणच्या तिसऱ्या प्रमुख नेत्याचा खात्मा झाल्याची माहिती समोर येत आहे. इस्त्रायलच्या संरक्षण विभागाकडून करण्यात आलेल्या दाव्यानुसार या हल्ल्यात इराणचे मंत्री इस्माईल खतीब यांचा मृत्यू झाला आहे.
दरम्यान एकापाठोपाठ होत असलेल्या आपल्या नेत्यांच्या मृत्यूमुळे आता इराण चांगलाच आक्रमक झाला आहे. इराणकडून अमेरिका आणि इस्त्रायलला थेट धमकी देण्यात आली आहे. आता आम्ही अशा शस्त्रांचा वापर करू जे यापूर्वी आम्ही कधीच वापरलेलं नाहीये. आम्ही आमच्या संरक्षणासाठी तयार असून आमच्याकडे हायपसॉनिक मिसाईल आणि इतर अनेक अत्याधुनिक शस्त्र आहेत, ज्याचा वापर आम्ही आता युद्धात करणार आहोत, अशी धमकी इराणेचे राष्ट्रपती मसूद पेजेशकियान यांनी अमेरिकेला दिली आहे.
Leave a Reply