मुंबई महापालिकेत एकनाथ शिंदेंची सर्वात मोठी मास्टर खेळी, आकडे बदलले, नेमकं काय घडलं?

गेल्या काही दिवसांपासून महाराष्ट्रात राजकीय घडामोडी वेगाने घडत आहेत. मुंबईतील महापालिका निवडणुका पार पडल्यानंतर दोन आठवडे उलटले आहेत. तरी अद्याप काही महापालिकेत महापौर विराजमान झालेला नाही. मुंबई महानगरपालिकेच्या सत्तासंघर्षात उपमुख्यमंत्री एकनाथ शिंदे यांनी मोठी मास्टर खेळी खेळली आहे. महापालिकेत आपला प्रभाव वाढवण्यासाठी एकनाथ शिंदे यांनी राष्ट्रवादी काँग्रेसच्या दोन्ही गटांना खिंडार पाडले आहे. एकनाथ शिंदे यांनी राष्ट्रवादीच्या एकूण ४ नगरसेवकांना आपल्या गटात खेचण्यात यश मिळवले आहे. या राजकीय भूकंपामुळे महापालिकेत शिंदे सेनेची ताकद वाढली असून महायुतीचा सत्तेचा मार्ग अधिक सुकर झाला आहे.

राष्ट्रवादीला मोठा धक्का

मिळालेल्या माहितीनुसार, उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेसचे ३ नवनिर्वाचित नगरसेवक आणि शरद पवार गटाचा १ नगरसेवक अशा एकूण चार जणांनी शिवसेना शिंदे गटात सहभागी होण्याचा निर्णय घेतला आहे. हे चारही नगरसेवक शिवसेना शिंदे सेनेच्या मुख्य गटात विलीन होऊन एकच गट स्थापन करणार आहेत. यामुळे विरोधकांच्या गोटात मोठी खळबळ उडाली आहे.

आकड्यांचे नवे गणित

या पक्षप्रवेशामुळे मुंबई महानगरपालिकेतील संख्याबळाचे चित्र पूर्णपणे बदलले आहे. याआधी शिवसेना शिंदे गटाकडे २९ नगरसेवक होते, आता ही संख्या ३३ वर पोहोचली आहे. तर भाजप आणि शिवसेना शिंदे गट यांचे एकत्रित संख्याबळ आता १२२ झाले आहे, जे बहुमतासाठी आवश्यक असलेल्या ११४ च्या आकड्यापेक्षा कितीतरी जास्त आहे. निवडून आलेल्या सदस्यांची संख्या वाढल्यामुळे शिवसेना शिंदे गटाला मिळणाऱ्या नामनिर्देशित (Nominated) नगरसेवकांच्या कोट्यातही वाढ होणार आहे.

अमेय घोले यांच्यावर मोठी जबाबदारी?

शिवसेना शिंदे गटाच्या या वाढलेल्या गटाचे नेतृत्व कोणाकडे जाणार, याचीही चर्चा आता रंगली आहे. सूत्रांनी दिलेल्या माहितीनुसार, युवा सेनेचे माजी नेते आणि महापालिकेच्या राजकारणातील अभ्यासू व्यक्तिमत्व अमेय घोले यांची शिवसेनेच्या गटनेते पदी निवड होण्याची दाट शक्यता आहे. अमेय घोले यांच्या निवडीमुळे पालिकेत प्रशासनावर पकड मिळवणे शिवसेना शिंदे गटाला सोपे जाईल, असे मानले जात आहे. या घडामोडींमुळे मुंबई महानगरपालिकेत आता शिवसेना शिंदे गट हा भाजपसोबत अत्यंत प्रबळ स्थितीत आला असून, आगामी महापौर निवडीतही या गटाची भूमिका निर्णायक ठरणार आहे.

राजकीय पुनर्रचनेचे संकेत

या ऐतिहासिक घडामोडीमुळे मुंबईच्या राजकारणात गट विलीनीकरणाचा नवा पॅटर्न पाहायला मिळत आहे. शरद पवार गटाच्या नगरसेवकाने शिवसेना शिंदे गटाची वाट धरल्याने महाविकास आघाडीत समन्वयाचा अभाव असल्याचे स्पष्ट झाले आहे. तर दुसरीकडे, अजित पवार गटाच्या नगरसेवकांनी शिंदे सेनेत जाणे हा महायुतीमधील अंतर्गत रणनीतीचा भाग असल्याचे बोलले जात आहे. या मास्टर खेळीमुळे केवळ आकड्यांचे गणितच सुधारले नाही, तर आगामी स्थायी समिती आणि इतर वैधानिक समित्यांच्या निवडीमध्येही एकनाथ शिंदेंचा शब्द महत्त्वाचा ठरणार आहे. विशेषतः अमेय घोले यांच्याकडे गटनेतेपद दिल्यास, मुंबईतील तरुण मतदारांना आकर्षित करण्यासाठी आणि महापालिकेच्या कारभारात आक्रमकपणे उतरण्यासाठी शिंदे सेनेला एक नवा चेहरा मिळणार आहे.

Source link