मुंबईतील विधानभवन परिसराला बॉम्बने उडवून देण्याची धमकी मिळाल्याने एकच खळबळ उडाली आहे. सध्या राज्याचे अर्थसंकल्पीय अधिवेशन सुरू असतानाच हा प्रकार घडल्याने सुरक्षा यंत्रणांची चांगलीच तारांबळ उडाली आहे. या घटनेची माहिती मिळताच पोलिसांनी तातडीने पावले उचलत विधानभवनातील कर्मचारी आणि नागरिकांना सुरक्षितरित्या इमारतीबाहेर काढले. तसेच सुरक्षेचा उपाय म्हणून सर्व अधिकारी आणि कर्मचारी यांना आत येण्यास मनाई करण्यात आली आहे.
मिळालेल्या माहितीनुसार, एकीकडे इराण, इस्त्रायल आणि अमेरिकेचा संघर्ष सुरु आहे. तर दुसरीकडे मुंबईतील विधानभवनात अर्थसंकल्पीय अधिवेशन सुरु आहे. हे अर्थसंकल्पीय अधिवेशन सुरु असताना मुंबईतील विधानभवनाला बॉम्बने उडवून देऊ, अशी धमकी ई-मेलद्वारे देण्यात आली आहे. त्यामुळे खळबळ उडाली आहे.
सध्या मुंबई पोलिसांचे विशेष पथक, बॉम्ब शोधक आणि नाशक पथक (BDDS) यांची सध्या विधानभवन परिसराची कसून तपासणी सुरु आहे. सध्या अर्थसंकल्पीय अधिवेशन सुरू असल्याने परिसरात अनेक नेते, आमदार आणि राजकीय नेत्यांची मोठी गर्दी पाहायला मिळत आहे. ही धमकी मिळाल्यानंतर खबरदारीचा उपाय म्हणून इमारतीमधील सर्व सामान्य नागरिकांना त्वरित बाहेर जाण्याच्या सूचना देण्यात आल्या.
Leave a Reply