फर्ज, रॉकी, बॉबी यांसारख्या एकापेक्षा एक हिट चित्रपटांमध्ये भूमिका साकारलेल्या अभिनेत्री अरुणा ईरानी या त्यांच्या खासगी आयुष्यामुळेही अनेकदा चर्चेत राहिल्या आहेत. अभिनेते महमूद यांच्यासोबतच्या अफेअरमुळे तर कधी दिग्दर्शक कुकू कोहलीसोबतच्या लग्नामुळे त्या प्रकाशझोतात आल्या होत्या. अरुणा ईरानी यांनी बऱ्याच काळापर्यंत त्यांचं लग्न लपवून ठेवलं होतं. आता नुकत्याच दिलेल्या एका मुलाखतीत त्या अभिनेते महमूद यांच्यासोबतच्या रिलेशनशिपबद्दल मोकळेपणे व्यक्त झाल्या. महमूद यांनी करिअरच्या सुरुवातीला माझी खूप मदत केली होती, परंतु नंतर हेच नातं माझ्यासाठी शोषण आणि वेदनेचं कारण बनलं होतं, असा धक्कादायक खुलासा अरुणा ईरानी यांनी केला.
‘झूम स्पॉटलाइट सेशन्स’ला दिलेल्या मुलाखतीत त्या पुढे म्हणाल्या, “महमूदजींनी माझं उघड शोषण केलं होतं. त्यांचं वागणं बदलत होतं आणि आमचं नातं फारच गुंतागुंतीचं झालं होतं.” अरुणा यांनी वयाच्या अवघ्या नवव्या वर्षी कुटुंबाच्या आर्थिक परिस्थितीमुळे फिल्म इंडस्ट्रीत काम करण्यास सुरुवात केली होती. जेव्हा महमूद यांच्याशी त्यांची भेट झाली, तेव्हा त्यांनी अरुणा ईरानी यांना मोठी ऑफर दिली होती. “महमूदजींनी मला पहिल्यांदा काम दिलं होतं. हे नातं एका अर्थाने नाईलाज आणि उपकाराच्या आधारावर सुरू झालं होतं. सुरुवातीला हा सहयोग फायदेशीर होता, परंतु जसजसं अरुणा ईरानी म्हणून माझी वेगळी ओळख निर्माण होऊ लागली, तसतसे ते माझ्यापासून दूर गेले”, असं त्यांनी सांगितलं.
अरुणा ईरानी यांनी असाही खुलासा केला की महमूद यांनी त्यांना लग्नाचं आश्वासन दिलं होतं. “ते मला त्यांची तिसरी पत्नी बनवू इच्छित होते. परंतु तसं होऊ शकलं नाही. महमूद यांचं आधीच दोनदा लग्न झालं होतं आणि त्यांनी पत्नीने त्यांना माझ्यासोबत काम करण्यास नकार दिला होता. त्यांच्या कुटुंबाने त्यांना माझ्यासोबत काम करण्यापासून रोखलं होतं. ब्रेकअपनंतर मला कुठेच काम मिळत नव्हतं. आम्ही विवाहित आहोत, अशा अफवा त्याकाळी पसरल्या होत्या. यामुळे माझ्या प्रतिमेला मोठा धक्का पोहोचला होता आणि माझ्या करिअरवरही वाईट परिणाम झाला होता. महमूद यांनी माझं करिअर घडवलं आणि ते उद्ध्वस्तंही केलं”, अशा शब्दांत अरुणा ईरानी व्यक्त झाल्या.
मी महमूद यांना पूर्णपणे दोषी मानत नाही, कारण सुरुवातीला मलाही त्यांची गरज होती, परंतु नंतर हे नातं शोषणासारखं वाटू लागल्याचंही त्या पुढे म्हणाल्या.
Leave a Reply