अक्षय मंकनी, प्रतिनिधी: नाशिकच्या ‘भोंदू बाबा’ कॅप्टन अशोक खरात प्रकरणात आता आणखी एक धक्कादायक पैलू समोर आला आहे. खरातच्या पत्नीच्या नावे असलेल्या जमीन व्यवहारात एसआरए (Slum Rehabilitation Authority) मधील अधिकारी अभिजीत भांडे पाटील यांच्या पत्नीचा थेट सहभाग असल्याची माहिती सूत्रांकडून समोर आली आहे. या आर्थिक व्यवहारामुळे राज्यातील प्रशासकीय आणि राजकीय वर्तुळात मोठी खळबळ उडाली आहे.
सूत्रांच्या माहितीनुसार, अभिजीत भांडे पाटील हे मूळचे महसूल विभागाचे अधिकारी असून, सध्या प्रतिनियुक्तीवर एसआरएमध्ये कार्यरत आहेत. उपमुख्यमंत्री एकनाथ शिंदे यांच्या वरदहस्तामुळे त्यांना एसआरएमध्ये हे पद मिळाले असल्याची चर्चा आहे. एसआरएच्या नियमांनुसार, उपजिल्हाधिकारी पदाचा अधिकारी प्रतिनियुक्तीवर फक्त ३ वर्षे काम करू शकतो. मात्र, अभिजीत भांडे पाटील गेल्या ४ वर्षांपासून या पदावर कार्यरत असल्याचे सांगितले जात आहे, ज्यामुळे नियमांचे उल्लंघन झाल्याचा संशय व्यक्त होत आहे.
नेमकं प्रकरण काय?
या प्रकरणातील मुख्य मुद्दा म्हणजे नाशिक तालुक्यातील पाथर्डी शिवारातील सुमारे १ एकर (४० आर) जमिनीचा सातबारा. या जमिनीवर अशोक कुमार खरात आणि अभिजीत भांडे पाटील यांच्या पत्नी प्रीती भांडे पाटील यांची नावे सामायिक (संयुक्त) मालकीदार म्हणून नोंदवलेली आहेत. हे व्यवहार केवळ आध्यात्मिक किंवा वैयक्तिक संबंधांपुरते मर्यादित न राहता थेट आर्थिक भागीदारीपर्यंत पोहोचले असल्याचे दिसते. खरातच्या अफाट संपत्तीच्या (२०० कोटींपेक्षा अधिक) चौकशीत हे कनेक्शन उघड झाले आहे.
एसआरए ही संस्था झोपडपट्टी पुनर्वसनासाठी काम करते आणि तिच्या अधिकाऱ्यांकडून अशा प्रकारचे व्यावसायिक व्यवहार होणे गंभीर बाब आहे. सूत्रांनी दिलेल्या माहितीनुसार, हे व्यवहार खरातच्या ‘ज्योतिष’ आणि ‘समस्या निवारण’च्या नावाखाली मिळालेल्या पैशांमधून झाले असण्याची शक्यता आहे. याशिवाय शिर्डी, सिन्नर आणि इतर परिसरात खरातच्या पत्नीच्या नावे कोट्यवधींच्या मालमत्ता असल्याचेही समोर आले आहे.
या गोष्टीमुळे एसआयटी (विशेष तपास पथक) आणि आयकर विभागाच्या तपासाला नवे वळण मिळाले आहे. अभिजीत भांडे पाटील यांच्या भूमिकेची, नियमांचे उल्लंघन झाले का आणि हे व्यवहार वैध आहेत का याची चौकशी होण्याची शक्यता आहे. खरात प्रकरण आता फक्त लैंगिक शोषणापुरते मर्यादित राहिलेले नाही, तर प्रशासकीय अधिकाऱ्यांच्या कुटुंबीयांशी आर्थिक संबंध, नियमबाह्य प्रतिनियुक्ती आणि संभाव्य प्रभाव क्षेत्रापर्यंत पोहोचले आहे. राज्यातील हे प्रकरण दिवसेंदिवस गंभीर होत असून, यातून आणखी मोठे गौप्यस्फोट होण्याची शक्यता वर्तवली जात आहे. SIT आणि संबंधित यंत्रणा याबाबत सखोल तपास करत असल्याचे समजते.
Leave a Reply