आजच्या आधुनिक युगात स्मार्टफोन हा आपल्या जीवनाचा अविभाज्य भाग बनला आहे. कारण हा स्मार्टफोन आता आपली रोजची कामे सोपी करतो, तसेच तासंतास लाईनमध्ये उभे राहण्यापेक्षा बँके पासून ते बिल भरण्यापर्यंतचं काम आपण घरात बसून मोबाईलमध्येच करत असतो. मात्र हे स्मार्टफोन फक्त कॉल करण्यासाठी आणि सोशल मीडियावरील व्हिडिओ स्क्रोल करण्याइतकं राहिलेलं नाहीये. तर त्यामध्ये असंख्य सेन्सर्स आहेत जे तुमचा फोन स्मार्ट बनवतात. तसेच या फोनच्या नॉर्मल यूजच्या व्यतिरिक्त त्यांचे इतरही अनेक उपयोग आहेत, ज्यामुळे तुम्ही तुमची दैनंदिन कामे सहजपणे पूर्ण करू शकता. आजच्या लेखात आपण स्मार्टफोनमधील अशा काही सेन्सर्सबद्दल जाणून घेणार आहोत जे तुमची अनेक कामे सोपी करू शकते.
फोनमध्ये असलेले सेन्सर मोशन आणि दिशादर्शन ट्रॅक करतात. यासाठी अॅक्सेलेरोमीटर आणि जायरोमीटर वापरले जाते आणि दोन्ही सेन्सर जवळजवळ प्रत्येक स्मार्टफोनमध्ये असतात. तर हे सेन्सर तुमचा फोन किती वेगाने आणि कोणत्या दिशेने फिरत आहे हे त्याचे दिशादर्शन दर्शवतात. हे सेन्सर्स लेव्हलिंग टूल म्हणून वापरले जाऊ शकतात. जर तुम्हाला फ्रेम, आरसा किंवा पोस्टर एखाद्या रूममध्ये लावयचे असेल तर तुम्ही त्याची योग्य लेव्हल मोजण्यासाठी या सेन्सर्सचा वापर करू शकता. तर असे अनेक अॅप्स उपलब्ध आहेत जे लेव्हल निश्चित करण्यासाठी या सेन्सर्सचा वापर करतात.
या सेन्सरमुळे योग्य ब्राईटनेसचा वापर करता येतो
तुमच्या फोनमध्ये अँबियंट लाईट सेन्सर आहे. यामुळे तुमच्या फोनला सभोवताल असलेला प्रकाश किंवा लाईट ओळखण्यास मदत होते. जर अंधार असेल तर सेन्सर फोनची ब्राइटनेस थोडी कमी करेल आणि जर तुम्ही उन्हात उभे असाल तर ते ब्राइटनेस वाढवेल, ज्यामुळे तुम्हाला डिस्प्ले अधिक स्पष्टपणे पाहता येतो. हा सेन्सर तुमच्या कॅमेरा किंवा डेस्क लॅम्पची ब्राइटनेस देखील मोजू शकतो, ज्यामुळे परफेक्ट लाईटिंग सुनिश्चित होते आणि डोळ्यांचा ताण कमी होतो. त्याचप्रमाणे हा सेन्सर फोनचा मायक्रोफोन ऑडिओ लेव्हल देखील मोजू शकतो.
Leave a Reply