अध्यात्म आणि दैवी शक्तीच्या नावाखाली महिलांची फसवणूक करणाऱ्या भोंदू बाबा अशोक खरातच्या प्रकरणाने नाशिकसह संपूर्ण महाराष्ट्रात खळबळ उडाली आहे. सध्या अशोक खरात हा पोलीस कोठडीत असून त्याची कसून चौकशी सुरु आहे. अशोक खरातच्या पोलीस चौकशीदरम्यान प्रत्येक दिवशी नवीन आणि धक्कादायक माहिती समोर येत आहे. आता नुकतंच पोलिसांनी केलेल्या चौकशीदरम्यान अशोक खरातने धक्कादायक विधान केले आहे. दुनिया झुकती है, झुकानेवाला चाहिए, असे उद्गार अशोक खरातने काढले आहे. याद्वारे त्याने स्वत:च्या कृत्यांचा निर्लज्जपणे बचाव करण्याचा प्रयत्न केल्याच्या पाहायला मिळत आहे.
अशोक खरातचा माज उतरेना
मिळालेल्या माहितीनुसार, अशोक खरातवर आतापर्यंत १० पेक्षा जास्त फसवणुकीचे आणि लैंगिक अत्याचाराचे गुन्हे दाखल करण्यात आले आहे. त्या प्रकरणी त्याची चौकशी सुरु आहे. सध्या तो पोलीस कोठडीत आहे. मात्र इतकं सर्व होऊनही अशोक खरातचा माज उतरला नसल्याचे पाहायला मिळत आहे. आता अशोक खरातने चौकशीदरम्यान अत्यंत अहंकारात दुनिया झुकती है, झुकानेवाला चाहिए, असे विधान केले आहे.
निर्दोष सिद्ध करण्यासाठी केली विचित्र विधाने
मी कोणतेही चमत्कार केले नाही.फक्त विज्ञानातील साध्या ट्रिक आणि हातचलाखीचा वापर करून लोकांना गंडवले. त्यासोबत महिलांना जाळ्यात ओढण्यासाठी त्यांच्या मनात भीती निर्माण केली, असेही त्याने म्हटले आहे. महिलांवर अत्याचार आणि फसवणूक केल्याचा कोणताही पश्चात्ताप त्याच्या चेहऱ्यावर दिसून येत नसल्याचे पाहायला मिळत आहे. त्याउलट तो स्वतःला निर्दोष सिद्ध करण्यासाठी विचित्र विधाने करत आहे.
यापूर्वी झालेल्या चौकशीतही खरातने पोलिसांना चक्रावून सोडले होते. त्याने आपल्यावरील आरोपांचे समर्थन करताना म्हटले होते की, महिलांसोबत केलेली कृत्ये हा केवळ एका विधीचा भाग होता. माझ्या अंतर्मनानेच मला आज धोका दिला आहे, मी आजवर ज्यांचे भले केले तेच माझ्यावर उलटले आहेत, असे विधान त्याने पूर्वीच्या तपासात केले होते. तसेच कोठडीत असतानाही तो सतत मंत्रजप करण्याचे ढोंग करतो. आता मी कोणाचेही ऐकणार नाही, फक्त माझ्या मेंदूचेच ऐकणार, असेही तो बडबडत असतो.
पोलिसांनी गोळा केले पुरावे
अशोक खरातच्या या विचित्र वागण्यामुळे पोलीस यंत्रणाही थक्क झाली आहे. कोठडीत बसून मंत्रजप करणे, विचित्र पुटपुटणे आणि स्वतःच्या कृत्यांचे दैवी विधी म्हणून समर्थन करणे, यावरून तो पोलिसांची दिशाभूल करण्याचा प्रयत्न करत असल्याचे स्पष्ट होत आहे. मात्र, नाशिक पोलिसांनी तसेच एसआयटीने त्याच्या तपासाचा फास अधिक घट्ट केला आहे. तसेच तो करत असलेल्या सर्व काळ्या कृत्यांचे सविस्तर पुरावे पोलिसांकडून गोळा केले जात आहे.
Leave a Reply