हिंदी चित्रपटसृष्टीतील लोकप्रिय गाणं ‘गोरी है कलैया’ मुळे प्रसिद्ध झालेल्या जया प्रदा यांना कोणत्याही ओळखीची गरज नाही.70 आणि 80 च्या दशकात त्यांनी चित्रपटसृष्टीवर अक्षरशः अधिराज्य गाजवलं होतं. त्या काळात त्या सर्वाधिक मानधन घेणाऱ्या अभिनेत्रींमध्ये गणल्या जात होत्या. मात्र, प्रेमात त्यांनी स्वतःच्या करिअरवर मोठा धोका पत्करल्याची चर्चा आजही रंगते.
जया प्रदा यांनी केवळ 14 व्या वर्षी Bhoomi Kosam या तेलुगू चित्रपटातून अभिनयाची सुरुवात केली. हिंदी चित्रपटांमध्ये त्यांनी सरगम या चित्रपटातून पदार्पण केलं, ज्यात त्यांच्यासोबत ऋषी कपूर दिसले होते. त्यानंतर त्यांनी अनेक हिट आणि सुपरहिट चित्रपटांमध्ये काम करत आपली वेगळी ओळख निर्माण केली.
10 रुपये मानधन
धमेंद्र यांच्यासोबत त्यांची जोडी प्रचंड लोकप्रिय ठरली. ‘शहजादे’, ‘धर्म और कानून’, ‘न्यायदाता’ यांसारख्या चित्रपटांमध्ये त्यांनी एकत्र काम केलं. तसेच सनी देओल याच्यासोबतही त्या ‘वीरता’ आणि ‘मजबूर’ या चित्रपटांत झळकल्या. विशेष म्हणजे, आपल्या पहिल्या चित्रपटासाठी त्यांनी केवळ 10 रुपये मानधन घेतलं होतं आणि नंतर त्या इंडस्ट्रीतील सर्वाधिक मानधन घेणाऱ्या अभिनेत्रींपैकी एक बनल्या.
मात्र, त्यांच्या वैयक्तिक आयुष्यामुळे त्या नेहमीच चर्चेत राहिल्या. जया प्रदा आणि चित्रपट निर्माते श्रीकांत नहाटा यांच्यातील प्रेमसंबंध त्या काळात खूप गाजले. 80 च्या दशकात आयकर विभागाच्या कारवाईदरम्यान श्रीकांत नाहटा यांनी त्यांना दिलेला पाठिंबा त्यांच्या नात्याची सुरुवात ठरल्याचं सांगितलं जातं.
बहिणीच्या मुलाला दत्तक घेतलं
1986 साली दिलेल्या एका मुलाखतीत जया प्रदा यांनी या नात्याची कबुली दिली होती. त्यांनी हेही स्पष्ट केलं होतं की, त्यांनी आपल्या कुटुंबापासून काहीही लपवले नव्हते. मात्र, या नात्याचा त्यांच्या करिअरवर परिणाम झाला. लग्नाच्या चर्चांनंतर त्यांच्या करिअरचा उतार सुरू झाल्याचं म्हटलं जातं.
श्रीकांत नाहटा आधीपासूनच विवाहित असल्यामुळे जया प्रदा यांना त्यांच्या घरी राहता आलं नाही. त्यामुळे त्या वेगळ्या राहू लागल्या. पुढे त्यांनी आपल्या बहिणीच्या मुलाला दत्तक घेतलं आणि त्याचा सांभाळ केला. चित्रपटसृष्टीपासून काही काळ दूर राहिल्यानंतर जया प्रदा यांनी राजकारणातही प्रवेश केला. त्यांचं खरं नाव ललिता राणी राव असं असून, नंतर त्यांनी ‘जया प्रदा’ हे नाव धारण केलं.
Leave a Reply