दिल्ली आणि गुजरातचं मिशन ‘फायनल’, एलिमिनेटर सामन्यात दोन्ही संघांचा सारखाच निर्णय, नक्की काय?

वूमन्स प्रीमियर लीग स्पर्धेतील चौथ्या मोसमातील (WPL 2026) एलिमिनेटर सामन्यात गतउपविजेता दिल्ली कॅपिट्ल्स विरुद्ध गुजरात जायंट्स आमनेसामने आहेत. अंतिम फेरीत पोहचण्यासाठी या 2 संघांमध्ये चुरस आहे. हा सामना जिंकणारा संघ ट्रॉफीसाठी अंतिम सामन्यात रॉयल चॅलेंजर्स बंगळुरु विरुद्ध भिडणार आहे. त्यामुळे दोन्ही संघांसाठी हा सामना आर या पार असा आहे. सामन्याला संध्याकाळी 7 वाजून 30 मिनिटांनी सुरुवात होणार आहे. त्याआधी 7 वाजता टॉस झाला. दिल्लीच्या बाजूने नाणेफेकीचा कौल लागला. कॅप्टन जेमिमाह रॉड्रिग्स हीने फिल्डिंगचा निर्णय घेत गुजरातला बॅटिंगसाठी भाग पाडलं आहे. अशात आता दिल्लीचे गोलंदाज आपल्या कॅप्टनचा फिल्डिंगचा निर्णय योग्य ठरवण्यात यशस्वी होतात का? हे पाहणं महत्त्वाचं ठरणार आहे.

दोन्ही संघांचा सारखाच निर्णय

दिल्ली आणि गुजरात या दोन्ही संघांनी एलिमिनेटर सामन्यासाठी सारखाच निर्णय घेतला आहे. दोघांनीही प्लेइंग इलेव्हनमध्ये कोणताही बदल केलेला नाही. दोन्ही संघांनी आपल्या त्याच 11 खेळाडूंवर विश्वास दाखवला आहे.

गुजरात जायंट्स प्लेइंग इलेव्हन : सोफी डिव्हाईन, अनुष्का शर्मा, एश्ले गार्डनर(कर्णधार), जॉर्जिया वेरेहम, बेथ मुनी(विकेटकीपर), भारती फुलमाळी, कनिका आहुजा, कशवी गौतम, तनुजा कंवर, रेणुका सिंग ठाकूर आणि राजेश्वरी गायकवाड.

दिल्ली कॅपिटल्स वुमन्स प्लेइंग इलेव्हन : शफाली वर्मा, लॉरा वोल्वार्ड, लिझेल ली (विकेटकीपर), जेमिमाह रॉड्रिग्स (कर्णधार), मारिझान काप, चिनेल हेन्री, निकी प्रसाद, स्नेह राणा, मिन्नू मणी, श्री चरणी आणि नंदनी शर्मा.

गुजरात आणि दिल्लीची साखळी फेरीतील कामगिरी

गुजरातने दिल्लीच्या तुलनेत साखळी फेरीत चांगली कामगिरी केलीय. गुजरातने साखळी फेरीतील 8 पैकी 5 सामन्यांत विजय मिळवला. तर दिल्लीला 8 पैकी 4 सामन्यांतच प्रतिस्पर्धी संघावर मात करता आली. विशेष म्हणजे गुजरातने साखळी फेरीत दोन्ही वेळा दिल्लीचा 4 आणि 3 अशा फरकाने धुव्वा उडवला. त्यामुळे गुजरातचा आता दिल्ली विरुद्ध सलग तिसरा विजय मिळवून अंतिम फेरीत पोहचण्याचा प्रयत्न असणार आहे. तर दुसऱ्या बाजूला दिल्लीचा गेल्या 2 सामन्यांतील पराभवाची परतफेड करुन अंतिम फेरीत पोहचण्याची परंपरा कायम ठेवण्याचा प्रयत्न असणार आहे. दिल्लीने याआधीच्या तिन्ही हंगामात अंतिम फेरीत प्रवेश केला आहे.