पंतप्रधान नरेंद्र मोदी इस्रायलच्या दौऱ्यावर गेले आहेत. पंतप्रधान नेतन्याहू आणि त्यांच्या पत्नीने त्यांचे विमानतळावर स्वागत केले. त्यांना विशेष गार्ड ऑफ ऑनर देण्यात आला. त्यानंतर पंतप्रधान मोदी यांनी इस्रायली संसदेला संबोधित केले. आपल्या भाषणात मोदींना दहशतवाद, व्यापार, तंत्रज्ञान यासह अनेक महत्त्वाच्या मुद्द्यांवर भाष्य केले. पंतप्रधान नरेंद्र मोदी यांच्या भाषणातील प्रमुख 10 मुद्दे जाणून घेऊयात.
- दहशतवादी हल्ल्यावर शोक : इस्रायलवरील हमासच्या हल्ल्याबद्दल पंतप्रधान मोदी म्हणाले की, ‘भारतीय जनतेच्या वतीने, मी 7 ऑक्टोबर रोजी हमासने केलेल्या त्या भयानक दहशतवादी हल्ल्यात मृत्युमुखी पडलेल्या प्रत्येक जीवितहानीबद्दल शोक व्यक्त करतो. आम्ही तुमचे दुःख समजतो. भारत आता आणि भविष्यात पूर्ण विश्वासाने इस्रायलसोबत खंबीरपणे उभा आहे.’
- निरपराध लोकांच्या हत्येचे कोणीही समर्थन नाही : पंतप्रधान मोदी पुढे बोलताना म्हणाले की, “निरपराध लोकांच्या हत्येचे कोणीही समर्थन करू शकत नाही. कोणीही दहशतवादाचे समर्थन करू शकत नाही. भारतानेही बऱ्याच काळापासून दहशतवादाचे दुःख सहन केले आहे. तुमच्याप्रमाणेच, आमचेही दहशतवादाबद्दल तडजोड न करणारे धोरण आहे. ‘
- दहशतवादाचा उद्देश समाजाला अस्थिर करणे : पंतप्रधान मोदी म्हणाले, ‘दहशतवादाचा उद्देश समाजाना अस्थिर करणे, विकासात अडथळा आणणे आणि विश्वास नष्ट करणे आहे. दहशतवादाचा सामना करण्यासाठी सतत आणि समन्वित जागतिक कृती आवश्यक आहे. दहशतवाद हा सर्वत्र शांततेसाठी धोका आहे.’
- होलोकॉस्ट : पंतप्रधान मोदी म्हणाले, “गेल्या महिन्यात जगाने आंतरराष्ट्रीय होलोकॉस्ट स्मरण दिन साजरा केला. होलोकॉस्ट हा मानवतेच्या सर्वात काळ्या अध्यायांपैकी एक आहे.
- व्यापार : व्यापारावर बोलताना पंतप्रधान मोदी म्हणाले की, ‘आम्ही व्यापार वाढवण्यासाठी, गुंतवणूक मजबूत करण्यासाठी आणि संयुक्त पायाभूत सुविधांच्या विकासाला प्रोत्साहन देण्यासाठी वचनबद्ध आहोत. गेल्या वर्षी झालेल्या द्विपक्षीय गुंतवणूक करारामुळे आमच्या व्यवसायांना चालना मिळेल.’
- स्टार्टअप नेशन :पंतप्रधान म्हणाले, इस्रायलला अनेकदा स्टार्टअप नेशन म्हटले जाते. 2018 मध्ये पंतप्रधान नेतन्याहू आणि मी भारतात आय-क्रिएट टेक बिझनेस इनक्यूबेटरचे उद्घाटन केले होते. तेव्हापासून, आम्ही अशा 900 स्टार्टअप्सना पाठिंबा दिला आहे.”
- प्राचीन संस्कृती : पंतप्रधान मोदी म्हणाले, ‘भारत आणि इस्रायल दोन प्राचीन संस्कृती आहेत. आमच्या संस्कृती परंपरा देखील तात्विक समानता प्रतिबिंबित करतात यात आश्चर्य नाही. इस्रायलमध्ये टिक्कुन ओलमचे तत्व जगाला सुधारण्यावर भाष्य करते. भारतात वसुधैव कुटुंबकम जग एक कुटुंब आहे यावर भर देते.
- गाझा शांतता उपक्रमाला पाठिंबा : पंतप्रधान मोदी म्हणाले, ‘भारत गाझा शांतता उपक्रमाला पाठिंबा देत आहे. हा उपक्रम पॅलेस्टिनी समस्येचे निराकरण करण्यासह या प्रदेशातील सर्व लोकांसाठी न्याय्य आणि चिरस्थायी शांततेचे आश्वासन देते.’
- वाळवंटात चमत्कार : पंतप्रधान मोदी म्हणाले की, “इस्रायलने वाळवंटात एक चमत्कार केला आहे. मी इस्रायलच्या तरुण प्रतिभेचे भारतात स्वागत करतो. इस्रायलमध्ये योगाचा प्रभाव वाढत आहे. इस्रायलमधील प्रत्येक घरात योगाचा अभ्यास केला जात आहे.’
- अर्थव्यवस्था : पंतप्रधान म्हणाले, ‘गेल्या काही काळापासून भारत जगातील सर्वात वेगाने वाढणारी प्रमुख अर्थव्यवस्था आहे. भारताने इतर देशांसोबत अनेक महत्त्वाचे व्यापार करार केले आहेत. आता आम्ही लवकरच जगातील पहिल्या 3 अर्थव्यवस्थांमध्ये सामील होऊ.’
Leave a Reply