तीन राज्यात सांप्रदायिक तणाव…जबलपूर, कर्नाटक आणि हैदराबादमध्ये काय झालं?

देशातील तीन राज्यात तीन वेगवेगळ्या ठिकाणी सांप्रदायिक तणाव निर्माण झाल्याच्या बातम्या आहेत. आझाद चौक क्षेत्रात गुरुवारी रात्री दुर्गा मंदिर परिसरात कथित तोडफोडीच्या वृत्तामुळे तणाव निर्माण झाला. मध्य प्रदेशच्या जबलपूर जिल्ह्यातील सिहोरा तालुक्याच्या वॉर्ड क्रमांक 5 मध्ये हे आझाद चौक क्षेत्र आहे. आरती आणि मशिदीत नमाज पठण एकाचवेळी सुरु होतं. याच दरम्यान कुठल्यातरी कारणावरुन वाद सुरु झाला. जो मारहाण आणि दगडफेकीपर्यंत जाऊन पोहोचला. कर्नाटकात शिव जयंतीच्या मिरवणुकीवेळी मशि‍दीजवळ दगडफेक झाल्याचं समोर आलय. त्यानंतर पोलिसांनी दोन्ही बाजूंना हटवून परिस्थिती नियंत्रणात आणली.

हैदराबाद अंबरपेट जामा मशि‍दीजवळ शिव जयंतीची मिरवणूक आणि रमजानच्या नमाजादरम्यान हलका तणाव निर्माण झाला होता. जोरदार म्युझिक आणि घोषणाबाजीवरुन शाब्दीक बाचाबाची झाली. पोलिसांनी तात्काळ हस्तक्षेप करत परिस्थिती नियंत्रणात आणली. तिन्ही ठिकाणी प्रशासनाने शांतता कायम ठेवण्याचं आणि अफवांपासून सावध राहण्याचं आवाहन केलं आहे.

या घटनेनंतर आझाद चौक क्षेत्रात तणाव

आझाद चौक क्षेत्रात आरोप-प्रत्यारोपादरम्यान दगडफेक झाल्याचं वृत्त आहे. या वादाची माहिती मिळताच जिल्हा मुख्यालयातून पोलीस अधिकाऱ्यांसह पोलीस पथक रवाना झालं. सिहोर पोलीस ठाण्यासह आसपासच्या पोलीस स्टेशनमधून पोलीस पथक घटनास्थळी पोहोचलं. पोलिसांनी तात्काळ परिस्थिती नियंत्रणात आणण्याचा प्रयत्न केला. या भागात सुरक्षा बंदोबस्त वाढवला आहे. या घटनेनंतर आझाद चौक क्षेत्रात तणाव आहे. पोलिसांचं परिस्थितीवर लक्ष आहे. आझाद चौक क्षेत्राचा भाग आधीपासून संवेदनशील मानला जातो.

मशि‍दीतून दगडफेक झाल्याचा हिंदू संघटनांचा दावा

कर्नाटकच्या बागलकोटमध्ये मशिदी समोरुन शिव जयंतीची मिरवणूक जात असताना वाद झाला. मशि‍दीतून दगडफेक झाल्याचा हिंदू संघटनांचा दावा आहे. पोलिसांनी दोन्ही बाजूंनी जमा झालेल्या लोकांना पांगवलं. स्थिती आता नियंत्रणात आहे.

हैदराबादमध्ये काय झालं?

हैदराबादच्या अंबरपेट मशि‍दीजवळ सांप्रदायिक तणावाचं प्रकरण समोर आलय. वादानंतर लगेच पोलिसांनी स्थिती नियंत्रणात आणली. माहितीनुसार, मशिदीसमोरुन शिव जयंतीची मिरवणूक जात होती.त्याचवेळी मशिदीत रमजानचं नमाज पठण चालू होतं. मिरवणुकीत वाजणार जोरदार संगीत आणि घोषणाबाजीवरुन दोन्ही बाजूंमध्ये शाब्दीक वादावादी झाली. वाद सुरु झाल्यानंतर घटनास्थळी पोहोचलेल्या पोलिसांनी जमावाला हटवलं. काहीवेळात परिस्थिती सामान्य झाली. कोणाचही नुकसान झाल्याची माहिती नाहीय. खबरदारी म्हणून घटनास्थळी पोलीस पथक तैनात केलं आहे. पोलिसांनी लोकांना अफवा न पसरवण्याचं आवाहन केलय.

Source link