अमेरिका आणि इराण यांच्यातील युद्ध आता भयंकर स्थितीत पोहोचले आहे. डोनाल्ड ट्रम्प यांनी इराणची सभ्यता नष्ट करण्याची धमकी दिली आहे. त्यामुळे आता हालचालींना वेग आला आहे. इराणमधील झपाट्याने बदलणाऱ्या परिस्थितीच्या पार्श्वभूमीवर भारताच्या दूतावासाने तिथे राहणाऱ्या भारतीय नागरिकांसाठी अधि सूचना जारी केली आहे. यात सध्या इराणमध्ये असलेल्या भारतीयांनी जिथे आहेत तिथेच राहावे. सुरक्षित ठिकाणी आश्रय घ्यावा आणि कुठेही जाणे-येणे टाळावे. पुढील 48 तास घरातून बाहेर न पडण्याचा सल्ला देण्यात आला आहे. तसेच बाहेर पडण्यापूर्वी भारतीय दूतावासाशी संपर्क साधावा, असेही आवाहन करण्यात आले आहे. याबाबत सविस्तर माहिती जाणून घेऊयात.
ट्रम्प यांच्या इशाऱ्यानंतर भारतीय नागरिकांसाठी अधिसूचना
अमेरिकेचे राष्ट्राध्यक्ष डोनाल्ड ट्रम्प यांनी इराणला 24 तासांमध्ये होर्मुजची सामुद्रधुनी खुली करण्याचा आणि करार स्वीकारण्याचा इशारा दिला होता. मात्र आता दिलेल्या मुदतीपूर्वीच अमेरिकेने इराणवर हल्ले सुरू केले. अमेरिका आणि इस्रायलने इराणमधील खर्ग आयलंड आणि रेल्वे नेटवर्कवर भीषण हल्ले केले आहेत. या हल्ल्यांनंतर इराणमधील अनेक शहरांमध्ये वीजपुरवठा खंडित झाला आहे. या हल्ल्यानंतर ट्रंप यांनी, ‘आज रात्री एक संपूर्ण सभ्यता नष्ट होईल. मला असे व्हावे असे वाटत नाही, पण तसे होईल.’ असा इशारा दिला आहे. त्यानंतर आता भारताने आपल्या नागरिकांसाठी सूचना जारी केली आहे.
ट्रम्प यांची ट्रूथ सोशलवर पोस्ट
डोनाल्ड ट्रम्प यांनी ट्रूथ सोशलवर पोस्ट करत लिहिले की, ‘एक संपूर्ण सभ्यता आज रात्री नष्ट होईल, जी पुन्हा कधीही परत आणता येणार नाही. मला असे व्हावे असे वाटत नाही, पण कदाचित तसे होईल. आज रात्री आपल्याला कळेल, जे जगाच्या दीर्घ आणि गुंतागुंतीच्या इतिहासातील सर्वात महत्त्वाच्या क्षणांपैकी एक असेल.’
इराण आर्थिक दहशतवाद पसरवत आहे – जेडी वेंस
ट्रम्प यांच्या या इशाऱ्यानंतर अमेरिकेचे उपराष्ट्राध्यक्ष जेडी वेंस यांनीही आक्रमक भूमिका घेतली आहे. त्यांनी म्हटले की, ‘आज रात्री आर्थिक दहशतवादाचा अंत करू.’ पुढे बोलताना त्यांनी इराण आर्थिक दहशतवाद पसरवत आहे असा आरोपही केला आहे. अमेरिका-इस्रायलच्या हल्ल्यानंतर इराणनेही प्रत्युत्तरात्मक कारवाई केली. इराणने मध्यपूर्वेतील अमेरिकेच्या तेल आणि वायू क्षेत्रांवर हल्ले केले, तसेच अमेरिकेच्या सहयोगी देशांच्या तेल-गॅस प्रकल्पांनाही लक्ष्य केले. याशिवाय, इराणने इस्रायली लष्करी ठिकाणांवर हवाई हल्ले केले आहेत. त्यामुळे आता या युद्धाला एक नवे वळण मिळाले आहे.
Leave a Reply