स्वयंघोषित अंकशास्त्रज्ञ आणि राजकीय वर्तुळात सक्रिय असलेले कॅप्टन अशोक खरातच्या अडचणीत चांगलीच वाढ होताना दिसत आहे. नाशिकच्या ‘भोंदू बाबा’ कॅप्टन अशोक खरात प्रकरणात तपास यंत्रणांनी मोठी खेळी खेळली आहे. विशेष तपास पथकाने (SIT) चौकशीचे ठिकाण अचानक बदलले असून, आज खरातची चौकशी अज्ञातस्थळी करण्यात येत आहे. तीन दिवस गुन्हे शाखा आणि पोलीस क्लब येथे सुरू असलेली चौकशी आता वेगळ्या ठिकाणी हलवण्यात आली आहे.
काल कोणत्या विषयांवर चौकशी झाली?
SIT प्रमुख तेजस्विनी सातपुते स्वतः या चौकशीला उपस्थित राहत आहेत. काल (शनिवारी) अशोक खरातची तब्बल सात तास चौकशी झाली होती. या चौकशीत खरातच्या मालमत्ता, आर्थिक व्यवहार, जमीन खरेदी, देणगीदार, भागीदार आणि महिलांशी संबंधित अनेक मुद्द्यांवर सखोल विचारणा करण्यात आली.
आज अज्ञात स्थळी चौकशी
आजच्या चौकशीत मात्र खरातला अज्ञात ठिकाणी नेण्यात आले असून, तेथे त्याच्या फार्महाऊसवरील कर्मचारी आणि मंदिरातील पुजारी यांचीही चौकशी होणार आहे. सूत्रांच्या माहितीनुसार, फार्महाऊसवर काम करणारे कर्मचारी आणि मंदिरात पूजा-अर्चना करणारे पुजारी हे खरातच्या दैनंदिन कारभाराचे महत्त्वाचे साक्षीदार मानले जात आहेत. त्यांच्याकडून मिळणाऱ्या माहितीमुळे खरातच्या ‘ज्योतिष’ आणि ‘समस्या निवारण’च्या नावाखाली चालवल्या जाणाऱ्या व्यवहारांचा आणि महिलांशी झालेल्या संवादांचे आणखी स्पष्ट चित्र समोर येऊ शकते.
खरात सध्या SIT च्या रडारवर असून, त्याच्याकडून मिळालेल्या माहितीच्या आधारे आणखी काही ठिकाणी छापे टाकण्याची शक्यता वर्तवली जात आहे. यापूर्वी खरातच्या घर आणि कार्यालयातून ८ लाख रोख, पिस्तूल, आक्षेपार्ह व्हिडिओ, मालमत्तेची कागदपत्रे जप्त झाली आहेत. तसेच आयकर विभागानेही त्याच्या कोट्यवधींच्या मालमत्ता आणि व्यवहारांची चौकशी सुरू केली आहे. या प्रकरणात आता फार्महाऊस, मंदिर आणि त्येथील कर्मचाऱ्यांच्या भूमिकेवर लक्ष केंद्रित झाले आहे. SIT च्या या अचानक चौकशी स्थान बदलण्यामागे गोपनीयता राखणे आणि बाहेरून दबाव टाळणे हा उद्देश असल्याचे मानले जात आहे. खरात प्रकरण दिवसेंदिवस अधिक गंभीर होत असून, येत्या काही दिवसांत आणखी मोठे खुलासे होण्याची शक्यता आहे.
Leave a Reply