बॉलिवूड अभिनेत्री आणि डान्सर नोरा फतेही सध्या पुन्हा एकदा चर्चेत आली आहे. ‘सरके चुनर तेरी’ या गाण्यावरील वाद अद्याप शांत झालेला नसतानाच तिचं नवीन गाणं सोशल मीडियावर व्हायरल होत आहे. नोरा फतेहीने 7 एप्रिल रोजी तिचं नवीन गाणं ‘Baddies’ इन्स्टाग्रामवर शेअर केलं. या गाण्याचे बीट्स प्रेक्षकांना खूप आवडत असून, म्युझिक व्हिडिओमध्ये तिच्या दमदार डान्सने पुन्हा एकदा चाहत्यांना भुरळ घातली आहे.
या गाण्यात नोरा पर्पल रंगाच्या स्टायलिश शायनी टॉपसोबत ब्लॅक जीन्समध्ये दिसते. विशेष म्हणजे तिचा लूक मॉडर्न असूनही मेकअप पूर्णपणे इंडियन स्टाइलमध्ये आहे. कपाळावर बिंदीही स्पष्ट दिसते. तिच्यासोबत बॅकग्राउंडमध्ये नाचणाऱ्या डान्सर्सचाही लूक मॉडर्न आणि इंडियन स्टाइलचा आहे. काहींनी नथही परिधान केली आहे. ज्यामुळे व्हिडिओला वेगळीच झलक मिळते.
मुंबईच्या रस्त्यावर शूट
या म्युझिक व्हिडिओमध्ये सर्व कलाकार मुंबईतील एका सार्वजनिक रस्त्यावर, दोन्ही बाजूंना उभ्या असलेल्या ऑटो रिक्षांच्यामध्ये डान्स करताना दिसतात. व्हिडिओमध्ये रस्त्यावरून जाणाऱ्या सामान्य लोकांच्या प्रतिक्रिया देखील दाखवण्यात आल्या आहेत. काही लोक आश्चर्यचकित दिसतात तर काही जण हसत प्रतिक्रिया देताना दिसतात. हे गाणं सोशल मीडियावर जोरदार ट्रेंड होत आहे.
दरम्यान, नोरा फतेही ‘सरके चुनर तेरी’ या गाण्यामुळे निर्माण झालेल्या वादातून अद्याप पूर्णपणे बाहेर पडलेली नाही. या प्रकरणात राष्ट्रीय महिला आयोग यांनी सुनावणी घेतली होती.
6 एप्रिल रोजी झालेल्या सुनावणीत नोरा उपस्थित राहिली नाही, त्यामुळे आयोगाने नाराजी व्यक्त करत तिला अंतिम संधी दिली आहे. आता तिला 27 एप्रिल रोजी सुनावणीला हजर राहणे बंधनकारक आहे.
View this post on Instagram
सुनावणीत काय घडलं?
पीटीआयच्या वृत्तानुसार, या सुनावणीत गीतकार रकीब आलम, ‘केडी: द डेविल’चे दिग्दर्शक प्रेम आणि केव्हीएन प्रोडक्शनचे प्रतिनिधी गौतम के.एम. व सुप्रिथ उपस्थित होते. सुनावणीचं अध्यक्षस्थान विजया रहाटकर यांनी भूषवलं.
यावेळी त्यांनी स्पष्टपणे सांगितलं की, गाण्याचे बोल महिलांच्या सन्मानाच्या विरोधात आहेत. क्रिएटिविटीच्या नावाखाली महिलांच्या प्रतिष्ठेशी तडजोड करता येणार नाही, असे त्यांनी नमूद केले.
सुनावणीदरम्यान संबंधित सर्वांनी गाणं आक्षेपार्ह असल्याचं मान्य केलं आणि त्याबद्दल लेखी माफीही मागितली. तसेच पुढील तीन महिन्यांत महिला सशक्तीकरणासाठी काम करून त्याचा अहवाल आयोगाला सादर करण्याचं आश्वासन दिलं.
Leave a Reply