भारत आणि अमेरिका यांच्यामध्ये एक मोठी ट्रेड डील झाली आहे, या ट्रेड डीलचा फायदा हा दोन्ही देशांना देखील होणार असल्याचं बोललं जात आहे. सध्या जगभरात या ट्रेड डीलची जोरदार चर्चा सुरू आहे. भारत आणि अमेरिकेमध्ये ट्रेड डील होताच अमेरिकेचे राष्ट्राध्यक्ष डोनाल्ड ट्रम्प यांनी एक मोठी घोषणा केली, ती म्हणजे डोनाल्ड ट्रम्प यांनी भारतावर लावलेला टॅरिफ कमी केला आहे. पूर्वी भारतीय वस्तूंवर अमेरिकेमध्ये 50 टक्के टॅरिफ आकारला जात होता, त्यामध्ये 7 टक्के कपात करण्याचा निर्णय या ट्रेड डीलनंतर अमेरिकेने घेतला आहे. मात्र अजूनही भारतावर 43 टक्के एवढा टॅरिफ आहे. भारत रशियाकडून तेलाची खरेदी करतो म्हणून अमेरिकेनं भारतावर अतिरिक्त टॅरिफ लावण्याची घोषणा केली होती.
अमेरिका आणि भारतामध्ये आता एक मोठी ट्रेड डील झाली आहे, मात्र याचा सर्वात मोठा फटका हा भारतीय नागरिकांना बसण्याची शक्यता आहे. भारतीयांच्या खिशावर या ट्रेड डीलमुळे मोठा ताण पडणार असल्याचं बोललं जात आहे. डोनाल्ड ट्रम्प यांनी अमेरिका फर्स्ट या रणनीतीनुसार भारतासमोर एक मोठी अट ठेवली आहे. भारताला रशियाकडून तेलाची खरेदी बंद करावी लागेल अशी ती अट आहे. तसेच रशियाकडून तेलाची खरेदी बंद केल्यानंतर त्याबदल्यात भारताला व्हेनेझुएला आणि अमेरिकेकडून कच्च्या तेलाची आयात वाढवावी लागेल असंही या अटीमध्ये म्हटलं आहे, जर भारतानं असं केलं नाही तर पुन्हा एकदा डोनाल्ड ट्रम्प यांच्याकडून टॅरिफ वाढवण्याचा इशारा देण्यात आला आहे. त्यामुळे आता प्रश्न असा निर्माण झाला आहे की? जर भारतानं अमेरिकेची अट मान्य केली तर त्याचा पेट्रोल, डिझेलच्या किमतीवर नेमका काय परिणाम होईल? पेट्रोल डिझेल दर किती रुपयांनी वाढणार?
भारताला जेवढी कच्च्या तेलाची गरज आहे, त्यातील जवळपास 85 टक्के कच्चे तेल भारत परदेशातून आयात करतो. गेल्या काही दिवसांपासून रशिया हा या क्षेत्रातील भारताचा सर्वात मोठा निर्यातदार देश बनला आहे. तसेच रशियाकडून भारताला कच्च्या तेलाच्या किंमतीमध्ये मोठ्या प्रमाणात सूट देखील देण्यात येत आहे. नुकतीच रशियाकडून भारताला प्रति बॅरल कच्च्या तेलामागे तब्बल 11 डॉलरपर्यंत सूट देण्याची घोषणा करण्यात आली आहे.
मात्र दुसरीकडे जर भारतानं अमेरिकेची ही अट मान्य केली आणि अमेरिकेकडून तेलाची खरेदी सुरू केली तर भारताला या तेल खेरदीमागे प्रति बॅरल 7 डॉलर अतिरिक्त खर्च येणार आहे. तसेच कोणतीही सूट मिळणार नसल्यानं भारतामध्ये पेट्रोल-डिझेलचे दर गगणाला भिडण्याची शक्यता आहे. तसेच रशियाच्या कच्च्या तेलाची क्वॉलिटी ही अमेरिकेच्या कच्च्या तेलापेक्षा अधिक चांगली देखील आहे. त्यामुळे आता भारत काय निर्णय घेणार हे पहावं लागणार आहे.
Leave a Reply