Baramati By Election : अजितदादा यांच्या निधनानंतर आता बारामती विधानसभा मतदारसंघासाठी पोटनिवडणूक होणार आहे. गेल्या कित्येक वर्षांपासून अजितदादा या मतदारसंघाचे आमदार होते. त्यांच्या नेतृत्त्वाखाली बारामतीमध्ये अनेक विकासकामे झाली. परंतु आता अजितदादा हयात नसल्याने या मतदारसंघाचा नवा आमदार कोण होणार? असे विचारले जात होते. अजितदादा यांच्याकडे असलेल्या उपमुख्यमंत्रिपदाची जबाबदारी आता त्यांच्या पत्नी सुनेत्रा पवार यांच्याकडे देण्यात आलेली आहे. असे असतानाच आता या पोटनिवडणुकीसंदर्भात महत्त्वाची माहिती समोर आली आहे. राष्ट्रवादी पक्ष बारामती मतदारसंघातून कोणाला उभे करणार? या प्रश्नाचे उत्तर आता मिळाले आहे.
नेमकी काय माहिती समोर आली आहे?
मिळालेल्या माहितीनुसार राष्ट्रवादी पक्षाच्या मोठ्या नेत्यांची महत्त्वाची बैठक झाली. या बैठकीत बारामती विधानसभा मतदारसंघाच्या पोटनिवडणुकीसाठी उपमुख्यमंत्री सुनेत्रा पवार यांनाच उभे करण्यावर एकमत झालेले आहे. म्हणजेच आता सुनेत्रा पवार बारामतीची पोटनिवडणूक लढवणार आहेत. सध्या त्या राज्यसभेच्या खासदार आहेत. उपमुख्यमंत्री झाल्यानंतर त्यांना आता सहा महिन्यांच्या आत विधानसभा किंवा विधानपरिषद यापैकी एका सभागृहातचे सदस्य व्हावे लागेल. त्यामुळेच सुनेत्रा पवार यांना पक्षातर्फे निवडणुकीच्या मैदानात उतरवले जाणार आहे.
बिनविरोध निवडणुकीचे संकेत
दुसरीकडे बारामतीची पोटनिवडणूक ही बिनविरोध होण्याची शक्यता व्यक्त केली जात आहे. तसे संकेत खासदार सुप्रिया सुळे यांनी दिले आहेत. बारामती विधानसभा मतदासंघाची प्ररूप मतदार यादी 10 मार्च रोजी प्रसिद्ध होईल. त्यानंतर कोणत्याही क्षणी पोटनिवडणुकीची घोषणा होण्याची शक्यता आहे. याबाबत बोलताना बारामतीची पोटनिवडणूक ही अर्थात बिनविरोध होईल. अजितदादा गेल्यानंतर ही निवडणूक होत आहे. महाराष्ट्रात सुसंस्कृत आहे. ही निवडणूक बिनविरोध होईल याबाबत मला तिळमात्र शंका नाही, असे मत सुप्रिया सुळे यांनी व्यक्त केले. शरद पवार यांच्या पक्षाचे प्रदेशाध्यक्ष शशिकांत शिंदे यांनीदेखील महाविकास आघाडीचे घटकपक्ष एकत्र बसून चर्चा करतील. त्यानंतर याबाबतची भूमिका आम्ही जाहीर करू, असे सांगितले आहे.
दरम्यान, सुनेत्रा पवार बारामती विधानसभा मतदारसंघाची पोटनिवडणूक लढवणार आहेत. तर दुसरीकडे अजितदादांचे सुपुत्र पार्थ पवार यांना राज्यसभेत पाठवले जाण्याची शक्यता आहे. त्यामुळे भविष्यात नेमकं काय काय होणार? हे पाहणं महत्त्वाचं ठरणार आहे.
Leave a Reply