राज्यातील २९ महापालिका निवडणुकांचे बिगुल सध्या वाजले आहे. येत्या १५ जानेवारीला महाराष्ट्रातील महापालिका निवडणुकांसाठी मतदान पार पडणार आहे. तर १६ जानेवारीला या निवडणुकांचा निकाल जाहीर केला जाणार आहे. याच पार्श्वभूमीवर सध्या राज्यात राजकीय भेटीगाठी, युती-आघाडी, जागावाटप आणि पक्षांतरच्या घटना वेगाने घडत आहेत. त्यातच अंबरनाथ नगरपालिका निवडणुकीच्या प्रचाराचा शेवटचा टप्पा सुरु असतानाच भाजपचे उमेदवार पवन वाळेकर यांच्या खाजगी कार्यालयावर अज्ञात व्यक्तींनी गोळीबार केला. या घटनेमुळे राजकीय वर्तुळात मोठी खळबळ उडाली आहे. याचा थरार सीसीटिव्हीमध्ये कैद झाला आहे.
नेमकं काय घडलं?
अंबरनाथ पश्चिमेकडील नवीन भेंडी पाडा या परिसरात बुधवारी मध्यरात्रीनंतर १२.१५ वाजता गोळीबार झाल्याची गंभीर घटना परिसरात घडली. भाजप उमेदवार पवन वाळेकर यांच्या कार्यालयाला लक्ष्य करण्यात आले. या घटनेच्या वेळी पवन वाळेकर हे कार्यालयात कार्यकर्त्यांसोबत उपस्थित होते. मिळालेल्या माहितीनुसार, दुचाकीवरुन आलेल्या दोन अज्ञात इसमांनी कार्यालयाच्या दिशेने गोळीबार केला. यावेळी हल्लेखोरांनी कार्यालयावर कमीतकमी चार ते सहा राऊंड फायर केले.
या गोळ्या कार्यालयाच्या समोरच्या काचेवर आणि काही भागांवर लागल्या आहेत. सुदैवाने गोळीबार सुरू होताच वाळेकर आणि कार्यकर्त्यांनी तात्काळ सावधगिरी बाळगल्याने कोणालाही दुखापत झाली नाही. त्यामुळे जीवितहानी टळली. गोळीबार केल्यानंतर हल्लेखोर तातडीने घटनास्थळावरून पसार झाले.
Leave a Reply